Biking Queens-i tetsür temaba jenjang nung ajungkettsütsü osang prokshir

Manipur kübok Imphal ajangdanga Myanmar bushia aoba jakdang Biking Queens ta ajaba tetsür bike anishir telok-i IGAR (N), Maj Gen MS Jaswal aser Naga nunger bike anishirtem den Kohima nung agiba arok noksa ka yangi angur. (Kohima, June 16)

Kohima, June 16 (TYO): Tetsür taküm jenjang temaba jenjang nung ajungkettsütsü osang prokshia alima linük 10 tashi semdanga senzütsü mapatong den sentaktepa, Biking Queens (BQ) ta ajaba tetsür bike anishir telok kati Kohima yasüng, Bodbar aonung tonga aruogo.
India sorkari tenzüka aliba ‘Jala kümzükang, jala temaba jenjang nung ajungketjang’ [Hindi oshi nung Beti Bachao, Beti Badhao (BBBP)] mapatong asangsang nung  atalokdaktsütsü nükjidong nung tetsür 4 densemba BQ teloki linük 10 semdanga senzütsü maparenji tenzüka lir.
Dr. Sarika Mehta, Yugma Desai, Khyati Desai aser Durriya Tapia nungeri tetsür taküm jenjang tajungba kümdaktsütsü mapatong ya tan June ita 4 nü nungi tenzüka Gujarat state kübok Surat nungi tenzükba osang angazükogo.
Parnoki anogo 36 tsüngda nung kilometer 10,000 shi bike nung jaja Nepal, Bhutan, Myanmar, Thailand, Laos, Cambodia, Vietnam, Malaysia, Singapore aser India sema BBBP aser tetsür o tebur na kasa jenjang nung benshitsü osang prokshitsü sentong lir.
Nagaland State Resource Centre for Women, kaketshirtem aser Naga nunger biker anishirtemi parnok yasüng Kohima nung pela agizüka liasü.
Parnok Kohima nung yasüng yipzük aser Inspector General Assam Rifles (North), Maj Gen Manvendra Singh Jaswal-i tenzüktsüba sülen, Manipur kübok Imphal ajangdanga Myanmar bushia tanü, Brehostibar nü ayamesoa ao.
India ajunga nung tetsür taküm jenjang tajungba kümdaktsütsü nükjidong nung India Ato Kilonser, Narendra Modi-i tenzüktsüba tongti mapatong ka BBBP ya lir.
Tetsür jala taküm kümzüka la nem kaketshisatsü tesayuba agütsüba ajanga lokti tentet nung tetsür aser teburtem kasa jenjang nung benshitsü aser tetsüpok nung alidang tetsür jala tepsetba aser tetsür rong nung tazüng temetet maliba khuret agientsü nükjidong nung iba BBBP mapatong ya tenzükogo.