Bilemdangang

~ T.Lima Tzüwar, Ungma Artang Ward.

Tamasa iba osang azünger ajak dangi Khristmas aser New Year salem abener. Temeim khristan tajungtem, taküma memeteti Khristmas mapang tonga arudaki, Khristmas aru yongya-a yimtsüng town aser lenmang kilong ajak sentsüpranga yangluba angur aser kanga tang menungra pelaseta repranger. Oda kotak lima jia yamai alitsü südi ta bilemer.
Asenoki kilong aser tema aser lenmang koma tepur junga yanglur yamaji asen mulungjanga merüka aser meshiteta lira aser Tsüngrem dak amanga lira aser sür asen tanüla kotaki aotsüsa asenok ajaki ochishia alitsü aser ochishia amangtsü merangdi arungma. Temeim khristan tajungtem aser nütsüng nüburtem na aser ni pa/laji tamanger taküm ka lir aser tamanger taküm aser kibong kaka asünung ajak kibong nung laishiba alitsü ta amanger aser zünga alitsü aser ken kaketa alitsü aser kena tena alitsü. Anungji laishibai kechi asen dang ashir, aser aseni ken atendang keni asenok dang kechi ashir ajakji angatettsüba aser metettsüba aser melenshitsüba sür nung shingaia memelenshir, tangari melenshiang ta mashiyonga laishiba azüngdang aser ken atendang asen sasa melenshitsüba lir.
Saka asen mulungjang nung Tsüngremi jembir masü mojingi jembir asünung tangar ashioktsütsü, tai aputsü, arishitsü dang bilema aliba tamanger aika lir. Asüküm tenük merem ngangsangatem, nüktapangta tang alir takümi kodanga mangatettsü südi, maneni tang lepshia ashir, oda tamanger kibong ajak nung laishiba alitsü aser zünga alitsü asünung tejen lai nung alima nung alir ajaki Tsüngrem aküm metsübu temenen agi sünger aliba Tsüngremi aji maginü nungji alima nung aliba ajak samatsütsü asoshi Tsüngremi Noa dang pa aser kibong kümzüktsü asoshi rong yangluang ta ashi. Noai rong yangludang nüburtemi pa kanga menütsü, atalatsü, Noa tekolok meshitak yiar alima patika kodang samatsü ta dang menütsü, saka tatem nung Noa-i ashiba atalok. Ano Isreal nunger Ijip nungi nungi aotsü asoshi sayatenya tapu-tapu sayu, saka Ijip nungertemi temulungjang tali merang, saka tatem nung Ijip nunger kibong shia nung nisung kaka südaktsü aser parnok mang yima jeptepa alidang Isreal nunger jena ao, Ijip nungeri parnok arishia ao saka Tsüngremi parnok ajak tzüyim nung samadaktsüba laishiba nung shia angutsü.
Ajidang masü Sotom Komora jata puta agi sünga aliba lima nüktapangta nisung tepsetba ngangsangatem asüküm tenük merem auyaba anemsü aser temenen agi sünga aliba Tsüngremi maginü nung mi agi rongdoktsütsü Lot dang shina ata. Saka nütsüng nüburtemi tashi manga kotak tenyar tang tepseta indoktsü merang, aser Lot aser kinungtsüi alima kanga meim aser par rongsen kanga apayua bilema kinüngtsüi aji meyipa reprangdang nung la-a metsütongshi aküm. Yamaji tang asenok nütsüng nübur aser tamanger takümtem iba dak nungi kanga agi tamajungba asünung mulungjang ya tajungba melenshir liyonga aotsü merangdi. Taküm Khristmas aser tarutsü aliba New year nungbo chi agi yangluba yi aser bottle nung aliba yi mamshitsü aser bomb mapoktsü merangdi arung.