Billboard-i Lady Gaga Woman of the Year shimmer

Los Angeles, September 30 (Agencies): Kenten magazine, Billboard-i nungtugu kentener, Lady Gaga 2015 Woman of the Year shimogo.

Oscars sentong nung Julie Andrews den külemi shilem agiba den külem, Tony Bennett den aroki alima tesem balala sema kenten sentong balala ayongla, Gaga-i college nung azünger aiür chanutem taküm tashiyim agi pei azüngba college telung nung raksatsüba khuret nokdanga kasaji agientsü asoshi tongti mapatong aika inyakba osang bushiteta lir.

“Alima ajunga nung nüburtem ajungmesotsü asoshi kententsü sabang nung Gaga inyakba ama tangari inyaka mali aser iba yongji Billboard-i la 2015 Woman of the Year shimgogo,” ta Billboard ketdang asüba Guggenheim Media’s Entertainment Group nung Tir, Janice Min-i metetdaktsü.

‘Born This Way’ ken atenla, Gaga-i taküm February ita agiba Oscar sempet agütsüba sentong nung Andrews den külemi ‘Sound of Music’ ken tena shilem agiba sülen iba sentong nung shilem agirtem den külemi, alima tesem balala nung alirtemi social media ajanga Gaga nem tenüngsang agüja liasü.

Gaga-i taküm küm tenzüker tanü tashi nung Bennett den külemi lungjemer alima tesem balala nung kenten sentong 36 tashi ayonga senzüba den külemi, lai tan September ita ‘Til It Happens to You’ video ken sayaba osang bushiteta lir.

‘Til It Happens to You’ video ken nung college balala nung azünger aiür chanutem tashiyim agi taküm raksatsüba documentary video-a densema lir.

Arishi küm 29 tain Gaga-i taruba hopta nungi tenzüka FX teloki ketdang asüba television sentong, ‘American Horror Story’ nunga tongti shilem agitsü sentong renema lir.

Billboard-i taküm December ita New York yimti nung sentong tajung ka agia Gaga nem Woman of the Year sempetji agütsütsü renema lir.

Country pop kentener, Taylor Swift-i yaküm agütsüba 2014 Woman of the Year sempet agizüka liasü.