Billy Joel-i kaketreju ana shibangtsü aliba nungi kümzük

November 24, 2015: Kaketshir tajemba küma sen arulen lenmang mesüa akümba ajanga Nassau County nung Boards of Cooperative Educational Services (BOCES)-i Arts indang Long Island High School aser Ongku indang Doshi Science Technology Engineering kaketrejutem shibangtsü sentong yanglua liasü.

Parnok sentong angashia Piano atemer mongin aser kentener, Billy-i kaketreju anaprongla ayutsü mepishia shidi ka zülu kechiba süra Arts school yagi pa nem kanga tajangzük agütsüa pa taküm nung jenjang yanglutsü.

Pai züluba shidiji tesüiba hopta, November 19 nü BOCES senden nung azüng. Iba shidi nung, “Long Islands-i Arts tesayuba metoktsütsüla. Ni iba reju nung azüngdang music tesayurtem music tsütsü tesayuba agütsüba ajanga kü tamendakdak ser tang tashi alir. Iba reju shibangba ajanga Long Island nung music mesamatsü, ajisüaka küm 40 tain reju ka shibangtsü melena Long Island aser New York State na nema tangtettsüsa tajungba küma yanglushi tajungba asütsü,” ta zülua liasü.

Joel indang manager-i ashiba agi, item rejutem asoshi Joel-i nija tenla agütsütsü mulunga lir.

BOCES ketdangsertemi item rejutem meshibangi kümzüka ayutsü asoshi November 30, 2015 nü senden ka mena sen lenmang tasen kar bushitsü atema olemtep akatsü.