Billy Zane o Bill Fishman na longjemtsü

Aenjeti/January 14 (Agencies): ‘Waltzing With Brando’ atema nüngtugu actor Billy Zane-i Bill Fishman den longjemtsü ternemba lir.
Arishi küm 52 tain Billy-i project tasenba nung nüngtugu actor tejen Marlon Brando indang shilem agitsü. Iba film ya Bernard Judge-i züluba otsü ka, kong Brando-i Bernard den environmental project balala nung inyaktsü atema Los Angeles tesem shiba otsü indang nung ajemdaker yanglutsü.
Katet nung zülua aliba otsü ya 1969 aser 1974 küm tsüngda atalokba indang lir aser otsü ajanga ashiba agi, Tahitian asetkong tilaka (island) nung alima indang mezüngbuba libajen tetemjen yimtsüng ka yanglutsü atema ‘Apocalypse Now’ film nung US Army Col shilem agisang Brando-i Judge ajungshi aser maparen tembangba sülen Brando-i iba tesem alizükba indang lir.
Film nung Zane-i shilem agiba den külemi pai Fishman den iba movie produce asütsü. Project atema tanüngba cast tem shimba sülem film ya taküm küm tom ka nungi tangok tenzüktsü asalentong yangludar.
1993 küm sayaba ‘Western Posse’ film kong Zane-i tongti shilem agia liasü, iba film ya Fishman-i direct asüba project ka lir.
Taruba TV series ‘Curfew’ nung Zane-i tongti shilem agidar. Iba denji külemi comedy thriller ‘Trouble Sleeping’ aser drama ‘Cliffs of Freedom’ film tem nung Zane-i shilem agiba angutsü.
Zane-i tatalokba otsütem anga aser jembitsü jangrar aser tang pai director Adam Morse, shiba nükpoker ka lir, pa indang documentary ka yanglutsü asalentong yangludar.
‘Titanic’ film nung shilem agisang Zane-i director Morse indang ‘Lucid’ film nung Elliot shilem agiogo.