Bipasha Basu aser Karan na April 30 nü kibong akümtsü

Mumbai, April 07, 2016 : Brihostibarnü actor ana, Bipasha Basu aser Karan Singh Grover nati tena April 30 nü kibong akümtsü ta osang tejangja metetdaktsüba sülen olulu aser tebilemba aika anenogo.

Tena kibong akümtsü tesem indang aser taoba ita kibong maküm tsüngda tena südoksema kazüba indang olulu aika online ajanga prokshiba mapang ka nung “Alone” film nung külemi shilem agir, Bipasha aser Karan nati kibong akümtsü osang tejangja metetdaktsü.

“Iba osang tajung ajak den lemsateptetba atema kanga pelar. April 30, 2016 nüji küna atema tongtibang anogo ka asütsü aser küna meima nungita yarirtem ajak dang pelaba shir meshimar,” ta sangdong ka ajanga metetdaktsü.

“Iba sentong nung nisung aika mejaoktsü. Küna atema olulu tamajung aika madoktsüba atema kanga pelar. Kibong tasen tenzüktsü atema nenok ajak temoatsü nüngdaker,” ta kasa sangdong nung shia lir.

Tena kiyimba sentong Bipasha’er Khar residence nung akatsü aser iba kibong akümba sentong nung anasatep kinünger kar denbo tembar kar jaoktsü. Iba sülen tamalen Palladium Hotel ta ajaba Lower Parel nung aliba St. Regis nung reception agitsü, ta tang tashi nung bendena aliba osang ajanga ashi.

April 28 nü Juhu nung aliba lounge bar, Villa 69 nung ‘mehendi’ sentong ka akatsü. Ajisüaka item osang yabo ano khen jangjashitsü nüngdaker.

Bipasha tan mezüng kibong akümerba lir, ajisüaka la John Abraham den medemba nübur ajaki kanga jangja meteta lir. Tan ya zünga Karen tasemben buba kibong akümerba lir.

Karan ya mezüng actress Shraddha Nigam den kibong aküm aser iba sülen Jennifer Winget dena ken kibong aküm.