Biplab Kumar Deb-i Tripura CM inyaktsü

New Delhi, Metsüremi (March) 6 (Agencies): Taruba Tripura chief minister ji Biplab Kumar Deb asütsü aser Jishnu Deb Burman-i deputy chief minister inyaktsü, ta tanü BJP-i metetdaktsü.
Iba osangji Agartala nung Union minister Nitin Gadkari-i ashi.
Tenangzükba agiba sentongji Rogonü (Hokolbar) Agartala nung aliba Swami Vivekananada Maidan nung agitsü akok aser Prime Minister Narendra Modi, Union minister tem aser BJP-i sorkar küma aliba state tem nungi chief minister tem den adentsü.
Taküm Tripura assembly election nung BJP-i menden 60 nungi 35 nung takok angu aser küm 25 tashi sorkar ketdangsüa aruba Left pur atsüngdok.
Biplab Deb ya Yimpoksüi (November) 25, 1971 nü Gomati district kübok Rajdhar Nagar yimtsüng nung aso aser 1999 küm Udaipur College nungi graduate asü.
Pa tebu Haradhan Deb ji Jan Sangh nung lennir ka liasü.
Biplab Deb graduate asüba sülen Delhi-i ao aser idakji gym instructor ka ama inyak aser RSS nung züngsem akü,.
Arishi küm 48 tain Deb-i küm 16 shi ka Gobinda Acharya aser Krishnagopal Sharma na lenisüba kübok RSS tenzüka aru.
2015 küm pa Tripura-i meyipa aru aser BJP atema Central Jan Sampark Pramukh mapa inyak.
Aenjeti (January) 6, 2016 nü Biplab Deb Tripura state president BJP inyaktsü shim. Pai Tripura nung mapang talangtiba tir inyaksang Sudhindra Dasgupta melenzük.
Deb indang kinungtsüji Niti lir aser la ya State Bank of India nung ketdangser ka lir. Tena jala ka aser jabaso ka lir.