Biren-i Manipur tasen atema yimjung alitsü ayongzüker

Imphal, May 7 (Agencies): Manipur Chief minister, Nongthombam Biren Singh-i ashiba agi, par sorkar asoshi tongtipang teinyaktsüji kasa terenlok angutsü atema lir.
Churachandpur kübok Lamka Press Club nung Honibarnü “Communal Harmony: Bridging the Gap” ta ser shisatokden ka nung o jembidang Biren Singh-i “ozü sorkari district shia atema sentong balaka renema lir” ta metetdaktsü.
August 31, 2015 nü state assembly-i Inner Line Permit (ILP) dak sendakba bill asem agizükba anema Kuki-Chin-Mizo nunger teimba sür aliba Churachandpur district nung mepetmesü tulu adok. Sorkar telemtetba anema lungkak aitba nung lisopur 9 tashi taküm sama aser tasür rongnung trokbo police injang agi asü.
Lisopurtemi bill asemji meyipa magi tashi tasür mangtem maremtsü ta tekong meranga, tang tashi Churachandpur district hospital mortuary nung mangtem yua lir.
Biren Singh-i tasür kibongtem asükhu lemsatepba metetdaktsüdang, “asenoki tesüiba aibelenbatem asoshi tatok agütsüdi aser amadokdi aser tetenzük tasen ka tenzükdi. State nung aliba kin aser telok balala tsüngda mangatettep aser tesempatep melii Manipur tasen ka yangerdi” ta ayongzük.
Iba onük ya tekaratiba nung angatetteptsü atema sorkari nübortem dang nungi teyari aginür, ta Manipur chief minister-isa mepishia metetdaktsü.
“Telok balala tsüngda mangatettepba ajanga asenok anogoshia inyaksangshi nung tetsükdaktsü ajurur aser ibaji ajanga asen state renloktsü aser tejakleni aotsü asoshi inyakba mapa sota ayur” ta paisa shisem.
Biren Singh-isa Lamka Press Club ki tasen ka yanglutsü atema nangzük aser taoba ita telungpurtemi General Reserve Engineering Force (GREF) gari ka amakdang aayanger ana tepsetba kibongtem nem sen lakh pungugu teyari agütsü.