Biren-i Police team ka nem sempet agütsütsü

Imphal, Luroi/August 21 (Agencies): Manipur Chief minister N Biren Singh-i Mongolbarnü, Thoubal district police team nem sempet agütsütsü nangzükogo. Iba police team yagi international shishilembadak temesepba mozü sen crore 100 alang pua liasü.
Parnoki August 17 nü Thoubal district kübok Lilong Moijing tesem nung heroin yangluba factory ka bushiteta international market nung sen crore 100 alang temesepba mozü seret 183 apu.
“Temesepba mozü aser iba yangludang amshiba hadir tem yagi nüburtem taküm raksatsütsü,” ta Singh-i ashi.
Heroin yangluba factory bushiteta temesepba mozü apuba atema Thoubal district police team nem sempet agütsütsü pa sangdongogo.
Maneni chief minister-i police tem dang garitem nung tinted glass inoker alibatem aputsü asoshi sentong ka achaayanga inyaktsü tetuyuba agütsüogo. Paisa, two-wheeler anishirtem dang helmets semer anishitsü mepishiogo.
Kasa mapang nung chief minister-i taoba Ato Kilonser Rajiv Gandhi sor küm 75 ajungba nü pa nem akhüm tetushi agütsüogo aser linük nung aliba nüburtem longjemtsü atema inyakba nisung ka pa liasü ta bilemtetshia jembi.

You must be logged in to post a comment Login