Biren Singh-i ‘Go to Village’ sentong nung aden

Manipur nung Go to Village Mission agidang Pradhan Mantri Ujjwala Yojana (PMUY) kübok tetsür nem angati LPG connections agütsüdang agiba noksa angur. 

Imphal, Monupii (May)16 (Agencies): Nübortemi temelenshi tajung aginüra, ibaji teküpoktiba jenjang nungi tenzüktsüla ta Manipur Chief Minister N. Biren Singh-i ashi.
Imphal West district kübok Govindagram Laiharaopung nung ‘Go to Village’ camp alidang Biren Singh-i iba tayongzükba agütsü. Iba camp ya district administration-i ayongzük.
State ajungalen ‘Go to Village’ sentong tenzükba mezüng anogo nung applicants 80,000 shi liasü aser kasa anogo nung 40,000 shi indang khurettem koktet, ta Chief minister-i metetdaktsü.
Taoba Mongulbarnü ‘Go to Village’ mission camp tanabuba shilem agi aser ibaji yimtsüng 52 nung ayonga agia liasü. Iba mapang applicants 68,000 shi aru aser item nungi onük 38,000 shi tembanga angaogo, ta Biren-isa ashi.
Nübortem khuret aser taginübatem metettsü atema luden ka shimtsü, ta paisa shisem.
Manipur state nung school züngtor anener 40,000 shi lir aser tawa tenzükba ‘Lairik Tamhanlasi’ scheme ajanga sorkar school tem nung azüngba kaketshirtem jangradaktsütsü. Iba scheme ajanga sorkar school nung azünger ajak admission/examination/tution fees, uniform aser text books agütsütsü, ta paisa metetdaktsü.
Yimtsüng ajak nung yim tzübo anasa tetsürtem atema metsümeshidak yanglutsütsü aser yimtsüng shia atema sen lakh 3.5 lemzüktsütsü, ta paisa shisem.
Iba sentong nung Agriculture, Fishery, Handloom & Handicrafts, Education dena department 25 shi kati nübortem khuret angatsü atema stall tem lapok.
Chief Minister-i stall ajak semdang aser iba mapang pai Indian Oil Corporation (IOC) ketdangsertem dang eligible beneficiaries 50 nem gas connection agütsütsü atema tetuyuba agütsü.
Biren Singh-isa beneficiary balala nem social security schemes kübok teyari balala lema agütsü.