Biren Singh-i India-Myanmar media interaction programme lapoktsü

Imphal, Nov 27: Hombarnü Manipur Chief Minister Biren Singh-i anogo ana India-Myanmar media interaction programme lapoktsüogo. Pai ashiba agi, par sorkari kidanger linük ana tesendaktep tajungba kümdaktsütsü asoshi bus service ka tenzüktsü atema merangdar.

Imphal, November 27 (Agencies): Manipur Chief Minister Biren Singh-i Hombarnü anogo ana akatsüba India-Myanmar media interaction programme yangi Imphal nung lapoktsüogo aser ashiba agi, par sorkari iba linük ana tsüngda nüburtem tali tajungba nung sendaktepdakltsütsü atema bus service ka tenzüktsü asoshi merangdangdar, ta osang ka ajanga metetdaktsü.
Myanmar nungi osangbener parnok terkai iba sentong nung shilem agidar.
Chief Minister Biren Singh-i ashiba agi, iba amala sentong ajanga India aser Myanmar na tali tesendaktep tajungba akümtsü. “Onoki Myanmar aser Manipur nung aliba nüburtem ajangzükdaktsütsü asoshi bus service ka tenzüktsü kanga merangdangdar. Iba ken o dak sendakba nung private company kati sorkar den tongtepogo. Manipur State Transport bus tem Manipur nung Imphal nungi Myanmar nung yimti kar tsüngda senzüdar,” ta pai ashi.
Biren-i Myanmar nungi osangbenertem dang kidanger linük ana tsüngda bus service tenzüktettsü asoshi jenjang tapeta ka agitsü asoshi mepishi.
Iba sentong ya Manipur tourism department, Information and Public Relations department aser state level committee of the Act East Policy pur longjemer ayongzükba sentong ka lir.
Chief Minister-i maneni Imphal-i entrepreneurs tem anir aruba atema Minister Counsellor (commercial), Royal Thai Embassy Thangdol Thongruang tenüng asang.