Biren Singh ya chichiba chowkidar lir: Amit Shah

April 5, 2019 nü Changlang nung BJP National President Amit Shah nem sempet ka agütsüdang agiba noksa angur. 

Thoubal/Changlang, April 5 (Agencies): Hokolbarnü BJP national president Amit Shah-i Congress aija jembidang “Congress sorkar alidang mokdang aser lungkak aitba sentongtem ajanga nüngdakba chiyungtsü aser osettsüset jenjangtem ajungket, saka BJP-i aniba sorkari Manipur nung mokdangba inyakyim agienogo” ta ashi.
Amit Shah-i Manipur nung BJP sorkar nem tenüngsang agütsü aser Chief Minister Biren Singh ya chichiba ‘chowkidaar’ lir ta ashi.
Biren-i Border Security Force nung mapa inyak anungji pa ya chichiba ‘chowkidaar’ lir, ta Shah-i ashi.
“Congress sorkar alidang mapang shia mokdang ayongzüka agi aser kabo anogo 160 tashi liasü. Iba ajanga kechisarena ajak nung jenjang atu. Ajisüaka, Biren lenisüba kübok Manipur nung mokdang mali kümogo” ta paisa shisem.
Manipur nung NDA sorkari Udan scheme kübok helipad 5 tashi yanglu aser tesüiba küm pungu tsüngda kilometer shi tasazük highway yanglu, ta Shah-isa metetdaktsü.
“UPA kübok 13th Finance Commission aser NDA kübok 14th Finance Commission medemdangra, Modi-i aniba sorkari northeast asoshi senotsü 238% talila lemzüktsü” ta paisa ashi.
Mary Kom nem tenüngsang agüja Amit Shah-isa “Manipur ya saisapongertem li lir. BJP-i aniba sorkari Manipur nung linük nung mezüngbuba national sports university yanglur” ta metetdaktsü.
“Tesüiba küm 40 tashi North Eastern Council senden maliasü, saka BJP sorkari mezüng senden amentsü ayongzük. Manipur nung kibong lakh 1.3 nem cooking gas connections angati agütsü” ta paisa ashi.
BJP president Amit Shah ya Northeast state tem nung elections atema nüboyima senzür aser tanü pai Arunachal Pradesh kübok Changlang district semdangba sülen Manipur kübok Thoubal semdanga liasü.