Bishnu Bhattacharjee-i Assam nung Netaji sentong nung shilem agi

Dimapur, January 24 (TYO) : January 23 nü Naojan, Assam nung 119 buba Netaji Shubhash Chandra Bose tasoba anogomung nüngtem nung ayongzükba sentong ka nung NPF Minority Wing President, Bishnu Bhattacharjee-i tongti tesemdanger ama shilem agi.
Iba sentong ya All Assam Bengali Youth Students Federation-i ayongzük aser kaketshirtemi Naojan highway aser temeket aliba yimtsüngtem nung Netaji indang noksa ayuba den wakotem alenloka ao.
Naojan Government School nung sentong agidang tongti tesemdanger Bhattacharjee-i Assam kübok Golaghat district nung lanurtemi Netaji bilemtetba atema tenüngsang agütsü.
Netaji-i linük asoshi pa taküm bendanga agütsü nungji lanurtemi linük yangerba maparen nung longjemer yariteptsüla, ta paisa ashi.
Iba sentong nung All Assam Bengali Youth Students Federation Vice president, Tapajyoti Sen den Karbi Anglong Bengali Samaj nungi Pankaj Ghosh nati tetushi tejaoker ama shilem agi.