Bishu-Mini Hornbill Tribal Festival 2019 temogo

Dimapur, January 28 (TYO): Bishu-Mini Hornbill Tribal Festival 2019 tembangba anogo nung Naga Council Dimapur President, T Pangerloba-i tetushi süa jaoker ka ama shilem agi.
January 28, 2019 nü Urban Haat Dimapur nung o jembidang Pangerloba-i Kachari nunger dang benjung tulu ayonga amungba atema tenüngsang agütsü.
Sorkar Department tem aser ano tangertemi stall balala lapokba atema paisa pelaba metetdaktsü aser idangji “Dimapur ya Nagaland nunger atema tongtiret ama lir. Dimapur dang mini India ta-a ajar aser kin temeyoktep aika külemi alir” ta NCD President-i metetdaktsü.
Asenoki asen sobaliba wazüka ayutsüla. Sobaliba aser inyaksangshi ya asenok indang maitsü lir anungji sobaliba samadaktsüra, ibaji asen maitsü samar ama asütsü, ta paisa ashi.
Pangerloba-isa Kachari nunger dang Naga nunger den külemi tejakleni aotsü ayongzük.
Naga yimten tebilemtsü ajanga asen loktiliba atema tetsükdaktsü bentsür arur anungji asenok ajak longjemer Naga yimten tekaratiba nung latettsü atema inyaktsüla, ta paisa ashi.
Sentong nung Deputy Director, Veyielo Doulo-ia okila jembidang “tsüngrem nem tenüngsang agütsütsü, temoatsü meshitsü aser telongjem atema asenoki benjungtem amunger” ta ashi.
Nisung kari Hornbill Festival amungba lutsür saka iba benjung ya ozü külemba indang masü saka kin ajaki ozümi amshiba atema sorkari benjung dak iba tenüng jaloktsüba lir, ta Duolo-i osang jangjashitsü.
Mezüngbuba session nung Mission Board, Chairman, Dimasa Baptist Hosom-i temoatsü meshia sarasadem, DPON President K. Napen-i tesentepertem pela agizük, Dimasa Cultural Troupe, Dhansiripar, Manipuri Cultural Troupe, Manipur, Moka Cultural Troupe & Nahor Cultural Society, Nahabari Village-i yartsüngsang ajanga shilem agi aser DPON Publicity Secretary Amon Difoesa-i anküp tepela o jembi.
Tanabuba session nung tetushi süa jaokerji Food Cooperation of India Area manager, Bankim Phonglo liasü.