BJP 21 Tuli Mandal Booth Level Workers Training agiogo

Tuli, Dec. 18 (TYO): Dec. 16, 2017 nü F&RMCA Hall, Tuli Town nung training Convenor, James Vizo leniba nung BJP state team-i BJP 21 Tuli mandal atema Booth Level Workers training ka katsüogo.
Iba training nung 21 Tuli nung party nung inyakertem 375 aden, aser parnok rongnung booth workers 210, mandal committee, frontals ajak aser unit officials 13 liasü.
Iba sentong nung jembidang shisalen sayur, K. Thong-i Centre nung BJP sorkari inyaktetbatem aser party-i benoka inyakba schemes balala metetdaktsü. Ano Yanghose Sangtam-i 2018 küm general election atema nüboyimba mapang nung jembitsü atema tongtibang onüktem metetdakja liasü.
Maneni sentong nung training convenor, James Vizo-i Centre nung aser Nagaland nung BJP tentetba indang metetdaktsü. Paisa BJP indang temzüngtem aser tenangzükbatem metetdakja, “Asen party ya secular aser meimchir temeim nung ajemdaker tentetba lir,” ta metetdaktsü.
Paisa party nung inyakertem dang, nisung kari tajangzük angutsü atema olulu balala prokba nung mamangtsüla, parnoki terenlok mapatem anemer, ta metetdaktsü.
V/P BJP Nagaland, Tsasepi Sangtam-i 2018 küm atema BJP election manifestos nung aliba vision documents onük 60 metetdaktsü. Item rongnung women arm police atema raraba hadir tebungpa, home & village guards itasen tutsütsü, Nagaland nung International Economic Business Development Centre amenoktsü, public transport jenjang dalang agi modernize sütsütsü, district headquarters ajak nung two-lane gari lenmang, pension scheme tutsütsü, küm shia teintet rogo 50 “Holy Land Jerusalem Tour” anir aotsü, higher secondary kaketshir takoker nem angati laptops, tesayurtem itasen shilem 10 agi timba kümtsütsü, angati ambulance service timba agütsütsü, irrigation facilities systemized sütsütsü, sensaker aluyimertem dang agri loan atoktsü densema lir.
Paisa party nung inyakertem dang Nagaland nung BJP sorkar amenoktsü atema kanga meranga inyaktsüla, kechiyong ibaji ajanga taruba election sülen terenlok atema party mangdang aliba ajak ataloktsütsü, ta ayongzük.
Training agiba sülen mandal aser unit officials-i onük balala nung shisa lemsatepa o lemtepba sülen party unit sasep nung meranga inyaktsü nangzük.
Mandal team-isa BJP nungi tokteptsü tebilemba alisang, L. Temjen Jamir-i teyari balala agütsüba atema pelaba metetdaktsü.
Secretary, Mahila Morcha 21 Tuli Wt. Alila leniba nung iba sentong agi aser Mandal President, Nuklutemjen-i lokti pelaa agizük aser district executive member, I. Toshi Lkr-i tepela anküp o jembia liasü.