BJP-AGP-BPF-i menden 12 mengura tenarong rangdoktsü: Hagrama Mohilary

Udalguri, April 3 (Agencies): Bharatiya Janata Party (BJP), BPF aser Asom Gana Parishad (AGP) teloktepi Assam nung Lok Sabha menden 14 nungi 12 nung takok angutsü, ta Bodoland Territorial Council (BTC) tanishir aser Bodoland People’s Front (BPF) chairperson Hagrama Mohilary-i ashi.
“Iba teloktepi menden 12 mengutetra, ni kü tenarong alangdoktsü” ta Mohilary-i ashi.
“Congress ya teraksa party ka kümogo. Tang ya BJP indang mapang lir. Dilip Saikia-i takok angutsü aser asenoki pa nem takok ngudaktsütsüla. Asenok atema Congress nüngdak mali” ta paisa ashi.
UPPL-i tenüng atema candidate tem tokteptsü shim. Iba ya onok atema khuret masü. BJP-BPF-AGP teloktep kanga tashi itta lir aser Lok Sabha elections nung takok tulu angutsü, ta Mohilary-isa metetdaktsü.
All Bodoland Students’ Union (ABSU) president Pramod Bodo-i Bodo nunger ashioktsü ta Mohilary-isa tai tongloktsü.
“2021 Assembly Election nung BPF den NDFB (Pro) aser ABSU tsüngda tokteptsü. Onok tajungtiba agi tokteptsü” ta Mohilary-isa shisem.
Assam nung BJP-i aniba sorkari welfare schemes tenzükba indang Mohilary-i metetdaktsü aser teloktep sorkar nem tashi agütsür maneni terenlok atema inyaktsü ta paisa shisem.