BJP-AGP tsükdaktsüba tetezü Assam Accord atema takok asütsü: Congress

Guwahati, Rongchii/April 18 (Agencies): April 23 nü Lok Sabha election phase tasembuba asoshi jenjang yanglushia Congress puri Brehostibarnü ashiba agi, BJP-AGP longjemer aliba party tsükdaktsüba tetezü Assam Accord atema takok lir, koba 1985 küm Centre, state sorkar aser anti-foreigner movement lenirtem tsüngda state bendanger nungi kümzüka ayutsü atema züngzüktepa ayu.
Election tasembuba phase magi tsüngda Citizenship Amendment Bill anema nokdakertem vote bendentsü atema, Assam atema Congress party in-charge aser taoba Uttarakhand CM, Harish Rawat-i ashiba agi, BJP puri parnoki sorkar kümtetra iba bill tanaben benoktsü ta shiogo koba Assam Accord anema lir.
“Iba bill agizükba tetezü Assam Accord tagidak maka akümtsü. Iba bill ajanga National Register of Citizens (NRC) update asüba ajak amajok kümdaktsütsü,” ta Rawat-i ashi.
August 15, 1985 nü sign asüba Accord ya 1980s mapang küm trok bendanger anema nokdakba sülen benok. Iba tenangzüktepba kübok state nung bendangertem March 24, 1971 ya tatembangbuba anogo sür pei linüki meyipa yoktsü lateta ayu. Tenangzüktepba ya iba mapang nung Ato Kilonser Rajiv Gandhi matsüngdang sign sütepa liasü. CAB ajanga Bangladesh, Pakistan aser Afghanistan nungi tamangba yimsü tsütsü rishikangshir shirnok 2014 December 31 tashi nung India-i arua lir, parnok nem lisopur jenjang agütsütsü asoshi meranger.
“Assam Accord sign asüba nung shilem agitetba atema Congress pur nema adanger. Anti-foreigner movement nung tongpo apur AGP lenirtem nokdakaka tang BJP den parnok longjemba ngua kanga süngmanger, shirnoki Bill tanaben bener arutsü nangzükogo,” ta Rawat-i ashi.
Taküm January ita parliament session mapang Citizenship Amendment Bill 2019 ya Lok Sabha nungbo agizük saka Rajya Sabha nung magizük. Iba bill ajanga Northeast ajunga nung mepetmesü adokogo aser BJP den sendaktepa aliba party temi iba bill agizükra parnok telungjem raksar aotsü amokmerena liasü. Assam kong iba bill anema kanga sashia nokdakogo, idaki AGP puri BJP toktsür ao saka Lok Sabha election atongtsü lia tanaben longjemshi.
BJP manifesto nung ashiba agi, “onoki kidanger linütem nungi tamangba yimsü tsütsü rishikangshirtem kümzüka ayutsü atema Citizenship Amendment Bill benoktsü asoshi bendanga agüja lir.”
Ato Kilonser Narendra Modi aser BJP tir Amit Shah nati lokti balala den jembiba mapang Assam nung lisopurtem tejangraba wazüka ayutsü atema Accord kümzüka ayutsü Centre-i bendanga agüja inyakdar, ta shiogo.
BJP puri, iba bill manifesto nung inokba ajanga Northeast nung election dak sendakba nung mekongshitsü ta shiogo, saka Congress puri iba ken o ya election dak sendakba BJP pur anema tongtibang onük ka kümdaktsütsü nangzüka liasü.
April 3 nü Congress tir Rahul Gandhi, Nagaland kübok Dimapur aser Assam kübok Bokakhat o Lakhimpur nung nüboyimba sentong nung shilem agiba mapang Congress puri Citizenship Amendment bill kodanga pass mesüdaktsütsü, ta ashi.
Gauhati, Dhubri o Barpeta aser Kokrajhar (ST) nung voter 74,77,062 lir aser iba tesem nung election April 23 nü agitsü.