BJP anema raratsü atema Congress Party den denang: Digvijaya Singh

Panaji, November 23 (Agencies): Tanü AICC General Secretary, Digvijaya Singh-i, Goa Assembly election nung Congress kijai tokteptsü, anungji BJP anema raratsü asoshi tanga party temi party nung denang, ta metetdaktsü.
“Menden 40 prongla nung tokteptsü atema onok renema lir. Shirnokisa BJP den raraner, parnoki ozü party nung adentsüla. Parnoki onok ticket nungi tokteptsüla. Party tangatetba alidak menden lemsateper. Telok tilala lemsar nenoki BJP anema raratettsü asü? Parnoki Congress nung adentsüla,” ta Singh-i ashi.
Goa Forward aser NCP ama party temi Assembly election nung BJP den tokteptsü atema Congress nung adentsü melungogo.
Congress-i Chief Minister candidate jelia sangdongtsü asü ta asüngdangba langzüdang Digvijaya-i, “Tesem kar dak alaka Congress-i Chief minister candidate mesangdonger. Parliamentary democracy nung elections ji tangatetba onüktem nung tokteper. Item nungji ajemdaker onoki nüburtem dang onok nem vote agüjang ta ashitsü. Onoki sorkar temerük ka agütsüner,” ta ashi.
2007 nungi 2012 küm Congress-i Goa yimsüsüba mapang Maharashtrawadi Gomantak Party den loktepbaji aibelen ka liasü, ta Singh-i ashi.
“Taoba mapang onoki MGP den teloktep yanglua liasü. Onok majority jenjang ka nung maliasü, aser MLA aikati onok rongshiba ajanga onoki atsüanema inyaktsüsa akum. Joko atsüanem masütsü atema 2017 küm nungbo onoki majority ajanga takok nguner,” ta Congress lenirisa metetdaktsü.