BJP anemba Front nung PM Candidate ji Mamata asütsüa akok

New Delhi, Chiteni 27 (Agencies): Taoba mapang Jammu and Kashmir Chief Minister, Omar Abdullah-i tanü Kolkata nung West Bengal Chief Minister Mamata Banerjee ajurua liasü.
National Conference lenir, Omar Abdullah-i, BJP anemba Front nung Mamata Ato kilonser candidate asütsüsa olen ka jembiogo, ta osang ka ajanga metetdaktsü.
Tanü West Bengal Secretariat nung Mamata ajuruba sülen Omar-i, “Onoki Mamata linük yimtibai anir aotsü, koba ajanga lai Kolkata nung inyakba mapaji linük tesem ajaklen reprangzüka inyaktsü,” ta ashi.
Taoba mapang J&K CM, Omar-i tanü Kolkata semdangba mapang nung pai, CM Mamata-i Jammu and Kashmir atema bilemtsüba asoshi pelaba lemsatep.
“Künati linük nung tang tendak tensa atema jembiogo aser linük tesem ajaklen minority tem tetsübu nung aliba onüka jembi,” ta paisa ashi.
Omar’er party National Conference (NC) aser Mamata’er party Trinamool Congress (TMC), dak sendakba nung pai, party ana tsüngda tetsüngda mali, ta ashi.
2019 küm Lok Sabha election nung BJP anema opposition party tem longjemtsü ta osang prokba mapang ka nung Omar-i, iba teloktep dangji kechia ajatsüar ano melemtet, ajisüaka BJP anema nokdaker ajaki onok den adentsü akok, onoki BJP tamakok ngudaktsütsü merangtsü, ta metetdaktsü.
Paisa, “Asenoki Ato kilonser candidate atema mejembili kechiyong Lok Sabha elections agitsü atema anogotema ano mesangdong,” ta ashi.