BJP anemba teloktep party temi PM menden arishi tenzükogo

New Delhi, April 29 (Agencies): 2019 General Election agitsü ano mapang talangka lir, saka BJP nung madenba party temi Ato kilonser menden arishi tenzükogo.
BJP anema teloktep party tem rongnung 2019 küm Lok Sabha election nung Narendra Modi anema toktepdaktsütsü atema ratamatar.
Parnok ajak rongnung Bihar Chief Minister, Nitish Kumar temaba jenjang nung lir ama reprangteter.
BJP anemba party rongnung Congress-i 2019 election Ato kilonser candidate ji Rahul Gandhi südaktsüner, aser parnoki temaba menden atema Nitish Kumar menungittsüa akok.
Bihar teloktep sorkar nung Congress densema lir aser parnoki taruba election nung Ato kilonser atema Nitish Kumar shimtsüji khenyongi anema nokdaker.
Bihar assembly election nung Congress-i Janata Dal (United) nungita liasü, ajisüaka tangbo Congress-i 2019 küm election nungbo JD(U) nem Ato kilonser menden atema Rahul Gandhi pusemdaktsüner.
General election agitsü ano küm asem anünga lir, ajisüaka Ato kilonser menden onük nung BJP anema loktepba party tem rongnung tangatetba balala lir.
Tamalen iba onük nung NCP tongti, Sharad Pawar-i Nitish Kumar pusema liasü ajisüaka tangbo pai, BJP anemaba party tem teloktep nungi Ato kilonser menden atema lenirji tang tangbo meshimtettsü, ta ashi.
Tamalen Economic Times den interview agidang Pawar-i, opposition party tem longjemra iba teloktep lenir atema Nitish Kumar temsüa lir, ta jembia liasü.
Ano anogo ishika tejaklen RJD tongti, Lalu Prasad Yadav-i, taruba Ato kilonser atema pai Nitish Kumar nungittsü ta sangdongogo.
BJP-ibo maneni Ato kilonser candidate atema Narendra Modi nungiter aser Congress Party-i Rahul Gandhi nungiter ajisüaka Samajwadi Party tongti lenir katibo iba menden atema party tongti, Mulayam Singh Yadav nungiter.
Samajwadi Party lenir Naresh Agarwal-i, regional party aikati Yadav lenir asütsü atema melunger, aser Ato kilonser menden atema Yadav temsüa lir, ta shiogo.