BJP anemertem longjemer, ta asüba ajanga süngmanger: BJP

Kolkata, November 22 (Agencies): Deobar nü BJP-i, Patna nung Nitish Kumar chief minister tenangzükba agiba sentong nung BJP anemer opposition front ka kümdar ta asüba atema süngmanger, kechiyong tenangzükba sentong nung adener party balala nungi lenirtemji nükjidong tulu alirtem, koba ajanga parnok longjemtsüji tasak asütsü, ta ashi.
BJP otongdar, Sambit Patra-i, Kumar tenangzüba agiba sentong nung Rahul Gandhi, Mamata Banerjee, Arvind Kejriwal, Farooq Abdullah, Sharad Pawar aser H D Deve Gowda nunger densema opposition lenirtem aika denogo, ajisüaka parnok ajakji nükjidong tulu ayurtem, anungji parnok longjemtsüji tasak asütsü, ta ashi.
BJP indang ‘Social Media Volunteers’ senden nung jembidang Patra-i, “Iba sentong nung Mamata Banerjee, Arvind Kejriwal nunger ama adenshia liasü. Ajisüaka parnoki iba nungji osang ka metetdaktsübaji tesüngmangtsüka. Parnokji nükjidong tulu alirtem. Parnok ajak national sabang nung nükjidong lir. Ibaji noklang nok aika taseptsü ka nung inokba den kasa lir,” ta ashi.
Congress tatong Tir Rahul, West Bengal aser Delhi chief minister, Mamata Banerjee o Arvind Kejriwal na, National Conference lenirtem aser taoba mapang Jammu & Kashmir Chief minister Farooq Abdullah aser par jabaso Omar, Assam nungi AIUDF lenir Badaruddin Ajmal aser taoba mapang Ato kilonser aser JDS tongti H D Deve Gowda nung ajak iba sentong nung dena liasü.
Bihar CM tenangzükba agiba sentong nungsa Congress chief minister tem- Virbhadra Singh (Himachal), Oommen Chandy (Kerala), Tarun Gogoi (Assam) aser Siddaramiah (Karnataka), CPI(M) lenir Sitaram Yechury, CPI lenir Sudhakar Reddy aser D Raja, DMK lenir M K Stalin aser T R Baalu nungera denogo.
Ano BJP den teloktep Akali Dal lenir Sukhbir Badal (Punjab Deputy Chief Minister) aser Ram Das Kadam aser Shiv Sena nungi Subhash Desai nungera iba sentong nung aden.
Centre sorkar tenüng nung Union Minister Venkaiah Naidu-a iba sentong nung dena liasü.
Opposition temi Third Front ka tentettsü akok asü (?) ta asüngdangba langzüdang Patra-i, “Third Front ya tamakok anguba Front ka süa aruogo aser tamakok anguba kuliji mapangshia nguogo. Parnoki Third Front ka tentettsü merangba ya tang mezüng masü; saka kecha matalok,” ta ashi.