BJP arunungbo !

Tang mapangba ya Nagaland nung yimsü tesüdak NPF pur melongjemtettsüsa telok ana küma pakdangogo aser Congress kechi koma asütsüar meshitetba tia ka nung lir, anungji BJP arutsü lenmang sadema lir. Ajisüaka, Nagaland nung alir Khristan-tem mulungjang nung BJP arunungbo ta asüba terata aser shisabolu ka lir. Iba ama shisabolu Naga nungertem dak reprangtetba agi, taoba hopta nung asenoki iba osangkaket nung, ” Nagaland nung BJP-i sorkar aküm nunga koma süla ?” ta asüba tasüngdangba ka nung shisalemsatepogo. Atangji, tanüa Nagaland DAN sorkar nung BJP tatartem dena lir aser oagi center nunga BJP teloki aniba NDA sorkar nung adener. Ajisüaka, tang tashibo Nagaland nung BJP teloki sorkar aküm tabo masü. Ajisüaka, Nagaland nung Congress telok laoba shia marutet aser NPF telok raksaba agi tashimait aküm ta süra BJP teloki Nagaland nung sorkar akümtsübaji ana nung lir. Iba jagi nübortem mulungjang nung BJP arunungbo ta asüba terata aser tebilemdangba mapangji tang lir.Atangji, nübortem den sensaksemdang angatetba agi Naga nunger shingaia yimten telok ka daka temulung lema mali. Iba jagi balaka election mapang nung sen meshir. Aji oda, Nagaland nung alir Naga nunger atemabo Congress, NPF, BJP keccha mali, shirnoki sen teimba agütsütetter ta asüba tsütsü dang tejak shitsütsü. Iba tangatetba nung tang NPF teloka oagi center nung BJP teloki aniba NDA sorkar nung aden asütsüa akok, kechiyong taoba parliamentary election mapangbo NPF telok NDA den mali asü. Ashiko, tang ya center nung Congress teloki aniba UPA sorkar alika asünungbo asenoka UPA nung denlaa akoka ta bilemer. Aji oda, Naga nunger yimsüsürtem nungi tenzüker nütsüng nübortem tashi yimten aser tanüla tangatetba mali sen sen dang bilemba agi asenok tarutsü jenjang tajung ka meyanglutet talangka timtema arudagi. Iba ama tangatetba aliba agi, asenoki yimten telok yabo mezüngshir saka shibai sen teimba bener arutsür ta asübaji dang züngshia yimten nung shilem agir. Ajisüaka, democracy nung yimten telok shia pei pei tangatetba lir, anungji BJP telok tangatetba aser nükjidongji India dang Hindustan ta ajatsü aser India ya Hindu lima asütsü ta asüba nükjidong asütsüa akok. Iba nükjidong ataloktsü asoshi India lima tesem tesem nung akhidang Hindu nungertem temulung meyipa Khristan kümer alirtem tanaben par yimsü dangi meyipdaktsüba angur. Iba denji ano India tesem aika nung nashi metepsettsü aser nashishi machitsü asoshi ozüng akangshia yangluba angur. Aji oda, anganüang tanganü, BJP telok yabo Khristan teloki akümba yimten telok kabo masü, anungji Nagaland nung BJP teloki yimsü asütsüsa mapang arunungbo arogo nung lenirtem asoshi tayongzükba tuluka asütsü. Atangji, telangzürtem kari ashia ama, yimten teloki masü saka nisungi yimsü asütsü, anungji yimten telok tenüng atemajibo kanga shisabutsü mali. Ibajia hau ta asütsüsa tang tashi nung Nagaland nung yimsüsüa arur yimten telok Congress o NPF na tamajung aser ochimashi nung tokteper amato katiang tamajungba aser katiang tamajungba ta yimsü asüba ngua arur. Ajisüaka, iba ama yimten telokji melennü dang Naga nunger sobaliba aser tamangba yimsü dak mapetba yimten telok ka nemang yimsüsütsü maoangka agütsüra asenok asoshibo takoksa nung anaben angur amai asütsü. Alima nung tatidang ya asenoki kanga aginüba aser kanga nüngdakba chiyongtsü aser oset agi dang atidanger. Aji oda, Yisua kanga yaseta alidang amtsük agi tendang aser talidak maka senzüa alidang kiojen tajung jenti yanglua aliba chuba yimti agi tendang, saka metsük. Aji oda, asenoka Yisu sülen anidakertem lir aser asenok senotsü agi kanga anünger, anungji asenok ya teti sen agi tendanger. Aser tetendang shia  asenokbo, Yisu memesük, tsükpet tsüker. Iba ama mapang ka ya arogo nung lenirtem temekong süra temekong aser tatsük süra tatsük ta asütsüba mapang lir. Iba amaji ka tamang aser tangatetba nung arogoi ochishia menokdaktetra, tang dang nungi tajungba asüng yimten yimsüsürtemi tenla  tajung agüja tenla kibo tajung yanglutsütsüa akok  saka tenla kidang Yisu külemi arurbo malitsü !