BJP aser Cong naprong ochimashi: Mayawati

Bhubaneswar (Odisha), April 02 (Agencies): Tanü Odisha nung Bahujan Samajwadi Party (BSP) tongti aser taoba mapang Uttar Pradesh Chief Minister, Mayawati-i, BJP aser Congress naprongla ochimashi; parnoki takartem tajangzük ngudaktsür saka dalit nunger aser minority tem ashioktsür, ta aitsü.
Tanü Odishia yimtiba, Bhubaneswar nung BSP election nüboyim sentong tenzükja BSP tongti, Mayawati-i, Ato kilonser, Narendra Modi aser NDA sorkari GST kanga aritepa benok aser iba inyakyim junga mebenokba ajanga linük lanurtem atema mapa manguba tebilemtsü tuluba kümdaktsü, ta ashi.
Demonetisation benokba atema BJP-i aniba sorkar aija lai, demonetization kanga aritepa benokba ajanga tilateri shishilembartem kanga takoksa angu, ta ashi.
“Congress aser BJP naprongla ochimashi. Bofors ochimashi nung Congress party-i shilem agiba osangkakettem nung adok, aser BJP sorkara Rafale deal ken o nung densema lir,” ta Mayawati-i ashi.
Party anaprong aija lai, parnoki kodanga dalit nunger, backward aser minority nüburtem atema meinyak, ta aitsü.
“Parnoki dalits nunger dang meshimejungi benshiba tangatetba melenshitsüla. BJP-i aniba NDA sorkar mapang nung mapa manguba tebilemtsü tuluba kümogo, aser ibaji ajanga mapa mengui alir lanurtem mepelar,” ta lai ashi.
Odisha nung BSP junga amenoka mali, ajisüaka tesüiba küm ishika lar party-i state Lok Sabha election aser Assembly elections naprongla nung toktepa arudar.
2014 küm BSP-i Odisha nung assembly menden 147 nungi menden 113 nung candidates toktepdaktsü saka parnoki vote shilem 0.86 dang angu. Tan election nunga lar party-i menden aika nung tokteptsü.
Odisha nung Lok Sabha election den külemi Assembly election-a shilem pezü küma lemsar April 11, 18, 23 aser 29 anogotem nung agitsü.