BJP aser IPFT na balala tokteptsü

Agartala, Rongjui/September 7 (Agencies): Tripura nung tang sorkar yimsü tesüdak party, BJP aser IPFT na Rongjui/Sept 30 nü panchayat bypoll nung külemi metokteptsü akok. Kasa mapang nung tang yimsü tesüdak party nungi züngsemtemi amokmerenba ajanga election agitsü asoshi mapang shidak masü, ta opposition party CPI-M aser Congress puri metetdaktsüogo.
Gram panchayats (3,207 seats), panchayat samitis (161) aser zila parishads (18) nungi züngsemtem aika mapa toktsüba aser kar süadokba ajanga menden 3,386 tazüng aküm aser iba atema by-election agitsüsa kümogo.
“Onoki menden 3,386 prongla nung candidate yoktsü. Iba ken o IPFT lenirtem den lemtepogo,” ta Law and Education Minister aser BJP election committee mendenbuba Ratan Lal Nath-i ashi.
Kasa mapang nung IPFT general secretary aser Forest Minister Mevar Kumar Jamatia-i, “Election nung party ana külemi senteper tokteptsü asoshi onoki BJP den sensak asemtsü. Tang tashi nung onok balala tokteptsü asoshi BJP den sensaksema mali,” ta ashi.
Tribal political party tongti rongnung ka, Indigenous Nationalist Party of Tripura puri iba election nung tokteptsü asü metoktepjar tang tashi mejangjai lir.
CPI-M lenir Bijan Dhar-i ashiba agi, “Metsüremi/March nung BJP aser IPTF na lokteper sorkar kümtetba sülen nungi tang tashi mepetmesü adoka arudar. Sorkar yimsü tesüdak party lenir aser parnok sülen anidakertemi opposition party nungi panchayat züngsemtem aika mapa nungi kangshia anendaktsüogo.”
“CPI-M aser BJP masüba party nungi züngsem shilem 96 kangshia mapa nungi anendaktsüogo,” ta Dhar-isa ashi.
Left Front aser Congress lenirtemi mapang balala nung Tripura State Election Commissioner G. Kameswara Rao den Yangtepnü ajurutepogo aser pa dang opposition nungi lenirtem kümzüka yutsütsü asoshi mepeshiba den election tesunep nung agitettsü asoshi jenjang tapet agitsü mepeshi.
Iba ken o dak sendakba nung BJP lenirtemi ashiba agi, panchayat züngsem timba ka parnok sasa mapa toktsü mesera CPI-M pur tetuyuba nung parnoki mapa toktsü asütsü.
Nath-i ashiba agi, CPI-M pur tamakok angutsü asatetogo anungji parnoki jembotsü asoshi inyaker.
“Onoki West Bengal nung ama pre-poll tensa madokdaktsütsü. Tripura nung ochi nung aser sadem sadema election agitsü. Shidakba nungbo CPI-M pur candidate mangur,” ta Nath-isa ashi.
Tripura nung panchayat elections tatembangsa 2014 Aami/June nung agi aser 2019 Aami/June nungang election agitsü lir.