BJP aser RSS dak lendong keta lir: K. Therie

Dimapur, April 30 (TYO): Nagaland State BJP-i nübortem ola angashia Khristan yimsü kümzüka ayutsü ta lemtetogo saka iba kisüng jagi meperir, kechiyong BJP indang shisalen sayurji RSS lir aser iba nung lendong keta lir, ta NPCC President, K. Therie-i ashi.
RSS-i rara ka tenzük aser ibaji 1925 küm Hindu Linük ka akümtsü nükjidong nung tenzükba liasü. Tang RSS volunteers million 6 shi lir aser RSS tesayuba agütsüba school 6,000 lapoka lir. BJP mapa inyakertem ya RSS züngsemtem lir aser BJP General Secretary shinga kibong küma mali, kechiyong parnoki mapang peria agüja inyaktsü atema kibong makümer, ta NPCC President-i sangdong ka nung metetdaktsü.
Parnoki mapang talangka agia inyaktsü sentongtem atonga inyaker aser secularism tangatetba anema mapang talangka sentongtem atonga inyakba telokji RSS lir.
RSS-i Khristantem anema inyakbaji alima nguogo aser alima lennirtemi India nung BJP sorkar dang Khristan tamangba anogotem mezüngmeshiba aser sensatsüba atema tekümdangtsü osangtem metetdaktsüogo.
BJP sorkari Christmas Day, Good Friday, Holy Saturday aser Easter Sunday tem official anogotem ta sangdongogo aser school tem nung Hindi aser Sanskrit oshitem compulsory kümdaktsür. Parnokisa Bhagwat Gita ya National Book kümdaktsütsü atema tebilemba benokogo aser BJP-i küm asem tashi sorkar ketdangsüa arudang, item sentongtem aser temelenshitem ya mapang agia mapa küma inyaktsü atema atonga inyakbatem lir, ta paisa ashi.
BJP-i Rajya Sabha nung aser state tem nung majority anguba sülen Uniform Civil Code (UCC) benoktsü. Iba ajanga Linük Temzüng Arrla 370 aser 371(A), (B), (C) amalatem nung temeten balaka agüja alibatem ajak agientsüsa akümtsü. Iba anogo nungji asen maitsü samatsü, kechiyong RSS atema UCC tetezüji Hindu Linük, Hindu yimsü, personal law ka aser tax ka lir, ta K Therie-isa shisem.
Nagaland State BJP nung inyakertem mulungjang nung Khristan tamangba yimsü aser Naga nunger maitsü kümzüka ayutsü ta asüba ochi tera danga lira, RSS aser BJP indang tasa anema inyaktsü atema secular teloktem nung adentsü ayongzüker ta paisa ashi.