BJP aser RSS-i India lemsatsü tasa atonger inyaker: Manik Sarkar

Agartala, November 1 (Agencies) : Tang asen linük nung taremzüktep maliba tensa ya Bharatiya Janata Party (BJP) aser parnok dang shisalen sayur Rashtriya Swayamsevak Sangh (RSS)-i linük lemsatsü tangatetba nung jelia tasa atonger inyakba ajanga lir, ta Tripura Chief Minister Manik Sarkar-i aitsü.
Deobarnü Agartala nung ki malirtem asoshi free housing scheme tenzüktsüba sentong nung Sarkar-i ashiba agi Centre sorkari linük nung sensopur tsüngdang masü saka RSS tsüngdang tashishitep melii inyaktsü meranger.
“RSS ya BJP indang temulungjang lir. Centre nung sorkarji RSS-i ketdang asür. Central minister temji India sensosangertem matsüngdang masü saka RSS tanishir Mohan Bhagwat aser tanga lenirtem matsüngdang apudaka lur inyaker” ta paisa aitsü.
Sorkar tasen aruba sülen asen linük nung tashiyim agi ketdangsütsü tenzükba asenoki angur, ta Tripura chief minister-isa ashi.
“Saisapong, kentenmenü, kaket züluba aser taküm nung teinyaktsü wadang ajak nung tamangba yimsü dak ajemdaker inyakertemi tashimaitertem dak tenük yoker” ta Sarkar-isa shisem.
“Iba ya jelia tasa atonger inyakba mapa ka lir, linük nung telemsa adokdaktsütsü nükjidong nung inyaker. India nung tangar dang nungi alakteta alibaji temeyoktep liaka telongjem lir. Hindu, Muslim, Buddhist aser Khristan tem tangatetba balala süaka asenok külemi liteter aser asen linük indang sobalibaji item tamangba yimsü balala meyoktepba nung amendaka lir, saka parnoki iba telongjem aser tangatetba raksatsütsü meranger” ta Sarkar-isa RSS aser BJP aitsü