BJP aser RSS-i linük Temzüng melenshitsü meranger: Congress

New Delhi, Aenjeti 22 (Agencies): Tentonü (Hombar) Congress Party-i, Bharatiya Janata Party (BJP) aser Rashtriya Swayamsevak Sangh (RSS) nati India linük temzüng (constitution) melenshitsü meranger, ta aitsü.
Twitter nung video ka ajanga Congress-i, RSS lenir aikati linük temzüng dak sendakba nung pei tebilemba jembiogo, ta metetdaktsü.
Iba video tetenzük nung Union Minister, Anantkumar Hegde-i, “Linük temzüng melenshitsü atema BJP sorkar tashii aru. Secular party temi parnok indang azü memetet. Linük temzüng aiben yanglushiogo, anungji onokia yanglushitsü. Iba atemaji ozü sorkar tashii aru,” ta jembia lir.
Congress-i ashiba agi, Hegde-i RSS tangatetba sülen anidaker.
Video nungsa RSS lenir, Golwalkar-i jembiba o, “India nunger temzüng nung India nunger tangatetba mesüra yimtenren tangatetba mali,” ta shia lir.
Ano linük temzüng nung ‘secular’ olong dak sendakba nung Jansangh tentetsang, Jayal Upadhyay-i, “Bharat ji secular linük ka, ta sangdongba ajanga Bharat tanela raksatsüogo. Secular linük ka nung timtem aika lir,” ta jembi.
Congress-i bendena yangluba video nungjisa linük temzüng reprangshitsü atema 2000 küm BJP-i aniba NDA sorkari Venkatchaliah Commission tentetba indang shia lir. Iba mapang nungji lokti aikati Commission anema longkak aita liasü.
Video nungsa 2015 küm BJP indang advertisement ka nung linük ‘Preamble’ nung aliba olong “secular” aser “socialists” na maliasü.
Ano BJP lenir aser Uttar Pradesh Chief Minister, Yogi Adityanath-i, “Inyakyim kecha secular mesütettsü aser iba o benoksang aser amshisangi tatok meshitsüla. Linük nüchiso anguba sülen India nung yazü olong tulutibaji ‘secular’ lir,” ta jembia lir.
Iba video dak sendakba nung tang tashi nungbo BJP-i telangzüba kecha agüja mali.