BJP aser RSS ya ‘God-se’ meimertem lir: Rahul Gandhi

New Delhi, May 17 (Agencies): BJP aser RSS na aija Hokolbarnü Congress Tir, Rahul Gandhi-i, parnok ya “god-se” meimertem lir, ta metetdaktsü.
Mahatma Gandhi khasetsang, Nathuram Godse dak sendakba nung Rahul-i iba o jembi.
“Ni tatemsabo angatetogo. BJP aser RSS na ya God-Ke meimertem masü saka God-Se meimertem lir,” ta Congress Tiri twitter ajanga metetdaktsü.
Maharastra kübok Bhopal Lok Sabha menden nungi BJP candidate, Pragya Singh-i, Nathuram Godse ya linük meimer ka lir, ta jembiba o dak sendakba nung Rahul-i iba o jembi.
Taruba Amongnü (May 19) Lok Sabha election shilem tatembangbuba agitsü lia BJP lenir asemi tashishitsü o jembiba ajanga party tenüng menüktsüba sülen tang BJP-i ibaji yanglushitsü merangdar.
Tanü BJP Tir, Amit Shah-ia, Union Minister Anantkumar Hegde, Pragya Thakur aser Karnataka nungi BJP MP, Nalin Kumar Kateel nungeri jembiba oji party-i süoki ia agir aser parnok dang telangzüba meshiogo, ta metetdaktsü.
Shah-i twitter ajanga, “Parnoki jembiba o parnok meyipa agiogo aser tatok-a meshiogo. Ajisüaka parnoki jembiba oji loktiliba aser party tangatetbatem den mapet. Parnoki jembiba oji süoki ia agia disciplinary committee matsüngdangi parnok yoktsü party-i telemtetba agiogo,” ta metetdaktsü.