BJP atema NE nung lenmang lapokogo: Amit

Allahabad, June 12 (Agencies): State pongu nung taruba Assembly election tem nung takok angutsü nükjidong nung tang Allahabad yimti nung anogo ananü BJP National Executive senden kadar, aser iba senden nung Union minister tem, BJP-i yimsüsüba state tem nungi Chief Minister tem, MP tem aser party lenirtemi shilem agidar.
Osang ajanga angazükba agi iba senden nung Ato kilonser, Narendra Modi-i BJP office ketdangpurtem dang, “Tanü putu yimtenren nung maneni tasen shisateta inyaktsü nüngdak. Yimtenren tensa apir inyakyim melenshia alitsüla,” ta shiogo.
Nikongdang osangbenertem den jembidang Shah-i senden nung jembiba metetdakja BJP lenir aser Union Minister, Ravi Shankar Prasad-i, “Tamalen Congress-i aniba UPA sorkari jila nung asü yimtsüng nung tama terenlok mapa inyaktsü, ta ratamata liasü, ajisüaka BJP-i jila aser yimtsüng na terenlok atema liromedema inyakogo,” ta ashi.
Iba senden nung BJP Tir, Amit Shah-i, Assam election nung takok anguba ajanga party atema northeast nung lenmang lapokogo, ta ashi.
“Assam nung onoki majority angu, aser ibaji ajanga BJP atema north-east nung lenmang lapok, Kerala nung onoki menden ka angu aser teloktep party tem den vote share shilem 15 angu.  West Bengal nung onoki telokteptem den vote share shilem 10 angu. Anungji iba ya BJP atema junga tenzüker ka lir,” ta ashi.
“Ozü sorkar yimsüsüba kübok ochimashi maliasü,” ta paisa ashi.
Tanü iba senden tenzüktsü lia Ato kilonser Allahabad tonga aruba sülen National office ketdangpurtem den senden tatsüka amen.
Osangbenertem den jembidang UP nung party lenir, Om Mathur-i, “Iba senden nung onük aika nung o lemteptsü, ajisüaka sangküm UP election onük tongtibangtiba asütsü,” ta ashi.
“Kashmir nungi Kanyakumari tashi aser Kutch nungi Guwahati tashi linük nung BJP tashikang salaogo,” ta paisa shisem.

You must be logged in to post a comment Login