BJP bangdak lenir asemi Shivraj tia latettsü

Bhopal, July 13 (Agencies): Madhya Pradesh nung Vyapam ochimashi ken o ajanga MP chief minister Shivraj Singh Chouhan tenüng kanga menükogo aser pa tiaji taruba anogo ishika tsüngda BJP Tir Amit Shah, RSS tongti Mohan Bhagwat aser BJP tatong Tir/MP nung party affairs in-charge, Vinay Sahasrabuddhe nungeri latettsüa akok.

Taruba anogo asemnü tsüngda lenir asemji MP yimtiba, Bhopal nung ajurua senden amentsü.

Bhagwat bo Bhopal tonga arua liasü aser Amit Shah o Vinay Sahasrabuddhe nata Hombar nü Bhopal tonga aruogo.

Iba mapang nung bangdak lenir asemi Vyapam ochimashi ken o nung chief minister Shivraj Singh Chouhan-i kechi shilem agia ali aser ibaji ajanga BJP tenüng koba tashi ka menüktsü’ar ibaji jembitsüa akok.

BJP state Tir Nandkumar Singh Chauhan-ibo, Vypam ochimashi ken o CBI-i bushitsüsa akümba ya Shivraj Singh Chouhan ajanga lir ta tenüng sanga jembiogo.

Congress-i Madhya Pradesh nung BJP sorkar minprongtsü merangba nungji tamakok angutsü, ta paisa ashi.

BJP Tir Amit Shah-i July 15 nü chief minister asem- Vasundhara Raje, Raman Singh aser Shivraj Singh Chouhan nunger ajurua state asem dak sentakba onüktem jembitsü.