BJP dak alaka ajaki ‘Solution not election’ melunger

Tentonü (Hombarnü) tezüluba nung sign asutsü

Kohima, Aenjeti (January) 27 (TYO): Tanü, Küptoknü Nagaland nung BJP dak alaka Naga People’s Front (NPF) densema yimtenren party ajaki Naga tribal tentettem aser state nung lokti tentettemi aginüba ama, election matongdang Naga yimtenren onük melatetra taruba State Assembly Election nung shingaia shilem magitsü melungogo.
13th Nagaland Legislative Assembly atema election Tsüklai (February) 27 nü agitsü Election Commission-i sangdonga lir, ajisüaka Naga nunger lokti tentettemi election inyakyim ajanga India-Naga yimjung ken o jembiba nung timtem agutsütsü südi ta arendaka Naga yimtenren onük melatet tashi election magi atatsü akhanger.
Tanü Kohima nung Core Committee of Nagaland Tribal Hohos & Civil Organisations (CCNTHCO)-i ‘Solution not Election’ onük nung ayongba senden nung yimtenren party asem- NPF, National People’s Party (NPP) aser Aam Admi Party (AAP)-i election nung shilem magitsü melunga liasü.
Aenjeti (January) 25, 2018 nü CCNTHCO-i ayongba senden nung yimtenren party pongu- Nagaland Pradesh Congress Committee, National Democratic Peoples’ Party, Janata Dal (United), Nationalist Congress Party aser Nagaland Congress party temi Naga nunger ola angaa election nung shilem magitsü melunga liasü.
Ajisüaka tanü senden nung tang State Assembly nung MLA pezü aliba party, Bharatya Janata Party (BJP) Nagaland unit madenba ajanga BJP bangdak tetuyuba nung security tashi amshia par candidate tem nem election nung toktepdaktsütsü atema kangshia tenüng agutsütsüdaktsütsüa akok, ta tarendakba liasü.
Iba den sendaka yimtenren party 8-i, parnoki tribal tentettem aser lokti tentettem taginüba ola angatsü, ta shiogo, ajisüaka parnoki Core Committee dang, iba atemaji nenoki mezüngbuba nung BJP-a dendaktsütsüla, kechiyong aji oda mesüra 1998 küm state assembly election amato tanaben ataloktsüa akok, ta metetdaktsü.
1998 küm 9buba Nagaland Legislative Assembly election nung Naga Hoho-i election nung shilem magitsü atema sangokja liasü, ajisüaka iba mapang nung ruling party, Congress-i security forces tashi tulu amshia election nung tokteptsü atema tenüng agutsü aser menden 60 aliba House nung menden 59 nung takok angu. Menden kaji Independent candidate kati ngua liasü.
Tanü senden nung NPF Tir, Dr Shurhozelie Liezietsu-i party tangatetba lemsatepdang pai, Election Commission-i Party recognize masüba aser election temaitsü – Aentepong sota ayuba ajanga party kanga timtemogo, ta metetdaktsü.
NPF Tirisa, “Onoki mapang ajak nung Naga yimtenren onük latettsü atema nokdaka aruogo aser maneni nüburtem taginüba ola angatsü, ajisüaka onoki taoba mapang (1998 küm) amato tanaben matalokdaktsüner,” ta metetdaktsü.
“Onoki sorkar nem ‘angati sempet’ ka ama yimtenren party ka danga magütsüner. Ozü party-i temepishiba angaa election nung metokteptsü, ajisüaka party kari dang election nung tokteptsü atema tenüng agutsütsü merangra, onoka renema atatsü aser election atema terenemshiba maneni alitsü, onokia kasaji inyaktsü, aser iba mapang nungjibo Naga nungeri onok manemtsüla,” ta NPF Tirisa metetdaktsü.
Senden nung NPP tatong Tir (Youth Wing), Katoho Sukhalu-ia party tenüng nung jembidang, “Küm aika tain Naga yimtenren onük tesünep nung latettsü onük nungbo NPP ya Naga nunger atema lir,” ta metetdaktsü.
Paisa, “Naga nunger tsüngda telemtetba ka dangi arura, aser yimtenren party tem tangatetba balala süaka nüburtem atema party ka ama NPFF-ia tongti telemtetba nungji adentsü,” ta metetdaktsü.
AAP Nagaland Unit Advisor, Sushil Kumar-ia, iba onük nung party-i akokba tashi amalitepa inyaktsü, ta metetdaktsü.
Ano külen JD(U) Nagaland Unit Convener, Senchumo NSN Lotha-i tanü sangdong ka ajanga, Naga nunger yimjung ken oji JD (U)-i pusemtsü, ta metetdaktsü.
Taruba General Election nung shilem magitsü dak sendakba nung National aser Regional yimtenren party ajak obang ka asütsüla, ta shia Senchumo Lotha-isa, “Ajaki agizüktettsüsa yimtenren latettsü atema Nagaland nung aliba nüburtem taginüba anema JD(U)-i menokdaktsü,” ta metetdaktsü.
Senden tembanga Core Committee Convenor, Theja Therie-i, “Election masü Yimtenren latettsü” onük nung parnoki BJP dang Naga nunger taginüba ola angatsü atema mepishitsü, ta metetdaktsü.
Paisa lokti dang, Tentonü (Hombar) tribal tentet ajak aser lokti tentet balalai state nung yimtenren party tem den senden ka mena election nung shilem magitsü aser election atsülangtsü atema tezüngzüktep ka agitsü, ta metetdaktsü.
Theja-isa, Aenjeti (January) 25 nü senden amenba sülen Core Committee-i BJP dang tanü senden nung adentsü atema tongtepratepa liasü, aser parnoki ibaji agizük, ajisüaka senden nung maden, ta metetdaktsü.