BJP dak alaka tanga secular party tem den yariteptsü: Congress

Taruba sorkarji NPF-isa akümtsü: Dr Shurhozelie

Kohima, Tsüklai 8 (TYO): Nagaland nung Congress teloki election tembanger secular political party mashi ka den tesentaktep ayutsü mulunga lir.
Tsüklai 27, 2018 nü Assembly election nung Congress-i shinga dena tesentaktep meyui dang tokteptsü, saka election agir sorkar akümtsü atema secular party tem den tesentaktep ayutsü mulunga lir, ta Nagaland Pradesh Congress Committee (NPCC) President, Kewekhape Therie-i ashi.
“BJP dak alaka onoki Nagaland state nung tanga political party tem den tesentaktep alitsü renema lir” ta paisa shisem.
Congress-i Nagaland nung kümsük asemben tashi sorkar benogo saka 2003 nungi kümsük asem atongtepa opposition menden nung amen. Iba jagi taoba Congress MLA-i Yimpoksüi 2015 nung Naga People’s Front (NPF) nung adentsüsa tensa ka ajuru.
Ano külen, NPF President Dr Shurhozelie Liezietsu-i tanga NPF sorkar arutsü anungji tanga political party tem sorkar nung adentsü jaoker ta metetdaktsü.
“Onoki maneni taruba sorkar akümtsü aser onok den adentsü jangraba telok tilatem anioktsü” ta pai ashi.
13 buba NLA election nung 4-Ghaspani-I Assembly Constituency dak alaka NPF-i menden 59 nungi tokteper.
Election nung shinga dena tesentaktep meyui toktepba saka taruba sorkar akümtsü atema yariteptsü ta ashiba telok tulu anaji- National People’s Party (candidate 27) aser JD(U) (candidate 15) lir.
Nagaland assembly election atema menden lemsar tokteptsü ta tesentaktep yangluba telok anaji- BJP aser Nationalist Democratic Progressive Party (NDPP) na dang lir.
BJP-i menden 20 nung aser NDPP-i menden 40 nung tokteptsü atema tenangzükba agitep aser iba tangatetba nung candidate tem shimogo.