BJP den melokteptsü: Shiv Sena

Mumbai, Tsüklai 02 (Agencies): Bharatiya Janata Party-i Rajasthan by election nung takok manguba aser Gujarat 2017 Assembly election nung junga takok manguba dak sendakba nung tanü Shiv-i, taruba 2019 Lok Sabha elections nung BJP den lokteptsüji tejembitsü maka, ta metetdaktsü.
Tanü Shiv Sena lenir, Sanjay Raut-i, “Gujarat elections tu film trailer ka liasü aser Rajasthan by election tu ‘interval’ liasü aser 2019 küm film tembanga sayutsü. 2019 küm election nung onoki tangar den meloktepi tokteptsü atema lemteta aliba nungi onoki mainshitsü,” ta metetdaktsü.
Shiv Sena ya Centre nung NDA sorkar aser state naprong nung BJP den loktepa lir.
Yashi Finance Minister, Arun Jaitley-i Union budget benokba dak sendakba nung Raut-i, “Jaitley-i benokba Union Budget 2018 ji kanga junger, ajisüaka ibaji kaket nung tezüluba ka dang asütsü. Aluyimertem soseta südar,” ta aitsü.
Congress-i Ajmer aser Alwar Lok Sabha by election narpongla nung BJP madak vote aikati takok ngua liasü. Congress-isa Mandalgarh Assembly menden nunga takok angu.
Congress-i by election nung takok anguba ya Vasundhara Raje-i aniba BJP sorkar atema osang tamajung ka lir, kechiyong parnoki maneni taruba state assembly election nung takok angutsü atema rangloker inyakba mapang ka nung by election nung party-i tamakok nguogo.
Mandalgarh Assembly menden nung Congress candidate Vivek Dhakar-i BJP candidate, Shakti Singh Hada madak vote tali 12,976 agi takok angu; Ajmer nung Congress candidate Raghu Sharma-i BJP candidate, Ramswaroop Lamba madak takok angu aser Alwar menden nung Congress lenir, Dr Karan Singh Yadav-i BJP candidate, Jaswant Yadav madak vote tali 196,496 agi takok ngua liasü.