BJP den onsara jungtepner !

Naga  People’s Front (NPF) nung tir aser Nagaland Chief Minister, Shurhozelie-i NPF telok ya BJP den tesendaktep tajung nung alitsü asoshi yanglu amai jembipet jembiba agi BJP atur aser NPF alur amai bilemer. Atangji, tang ya Nagaland nung NPF teloki aniba government nung BJP dena lir aser oagi Center nunga BJP teloki aniba government lir, anungji asenok ajak asoshi BJP telok teyari nüngdaker. Ajisüaka, BJP lenirtemi jembiba angadangra aser parnok temulungtetba reprangdangra, taruba election nung Nagaland nung assembly constituency 60 prongla nung aitsü temulungtetba nung jembiba angashir. Tetezü, NPF asoshi BJP ya teti yaritepa aotsü asoshi ajuruba tembar (natural ally) saka BJP telok asoshibo NPF telok ya teti tembar asütsü ajurubo masütsü amai parnok jakla nung reprangtetter. Tang tashi nung Naga yimten tsütsü BJP telokia koba tashika süoki ia bilemer aser koba tashika Naga nunger temeten aser timtem angateta ali, ibaji mejangjar saka Naga nungertemi BJP government nungi telemtetba tajung ka imlar. Iba jagi BJP den jungtepner asütsüa akok. Ajisüaka, Naga yimten tebilemtsü latettsüba yabo Center nung aliba “Ruling Party” den jungtepba agi ajungla masü. Ajungtsü asübo Congress mapang nung latetter lila aser tanga BJP government mapang ya lateter lila. Aji oda, Center nung aliba Ruling party den jungtep tashi Nagaland-i sen tali yoktsü aser iba sülen Nagaland nung parnok government akümtsü merangtsü. Iba amaji Congress teloki yimsü asüba mapang inyakba nguogo aser ajuruogo. Ajisüaka, Center government-i sen talila yokba agi Nagaland tajungba yanglu masü saka tsümartem nem parnok shilem agütsürbo tanüngba jagi Naga nunger ishika takar kümer asütsü. Kasaji tanga atalokdagi. Nagaland ya India kübok alir saka Naga nungertem ya India nunger memesük, anungji sen talila tera mangu agibo pei angatetba nung akangakanga nokdak tajungba. Iba tangatetba jagi tang tashi NPF tir Shurhozelie-i regional party medoktsüi arur. Atangji, Nagaland nung mapang talangka Congress teloki dang yimsü süa arunungji, idangjibo Regional party nung adentsübaji shisamaka aser temenünütsü mapa amai ka dang liasü. Item maksü aser timtem ajakji arema Shurhozeliei aruogo. Ajisüaka, tang Center nung ruling party teyari aginüdang, NPF telok ya BJP den teti külemi aotsü aso amai jembiba jagibo pa dang masü saka Naga nunger ajak alur amai bilemer. BJP telokjia parnok merang merangdakjang, yamaji Congress aser tanga Indian National party-temjiang merangdakjang. India ama nungbo yimten nung shilem agitsü shinga nokdanga mali. Ajisüaka, Naga nunger toktsür ao tsübur amato asenoki Indian National Party den kanga jungtepnüa jembira, iba jagi asenok akhüm samatsü aser Naga yimten temeten yaa tepongpaba kümadoktsü. Tangbo külem government asünungji tir election nung shiba yaritsü ta asüdangtsü madoker, Nagaland nung MLA ajak BJP teloki shimba candidate yaritsü. Ajisüaka, iba jagi Nagaland assembly election arudang BJP teloki NPF telok yaritsü ta masü. Iba yimten tensa tia ka nung Nagaland nokdaka lir. Nagaland nung Congress teloki yimsü asüba mapang “High Command” indang kanga jembiba angashiogo. Tetezü Nagaland atema Kohima nung masü saka Delhi nung alirtemi Delhi nung latettsü. Iba amaji maginüba agi, Nagaland government ya regional party nem kümdaktsü südi. Iba tangatetbaji Naga nunger yimten yimsüsürtem dak alitsüla. Tangbo asenoki Center government repranga party melener aser o a melena jembir, ajisüaka Center government dang nungibo Nagaland government tongtibangba ta bilema Nagaland asoshi aser Naga nunger atema inyaktsüla. Asenokibo Delhi nung yimsü tesüdak National party den jungtepner saka National party jagi parnok kisüngi government akümtsü meranger ta süra asenoki asenoksasa meshimetsür jenjangi alur aser parnokji asenoki kibur kümdaktsür !