BJP den sendaktepba atema Asom Gana Parishad (AGP) nung telemsa adok

Guwahati, March 8 (Agencies) : Assam nung taruba assembly election agitsü lia Asom Gana Parishad (AGP) nung telemsa adokogo.
Taoba hopta parnok BJP den yaritepa election nung tokteptsü ta osang sangdongba sülen Mongulbarnü state nung regional party tulutiba, AGP nung telemsa adok.
2001 assembly election nunga BJP-i AGP den tesentaktep yangluba sülen BJP nung telemsa adoka liasü.
Telok balaka razüka aobaji AGP (Anchalik) lir aser parnok menden 45 nungi tokteptsü ta party tanishir aser taoba AGP youth wing tir, Sunil Rajkonwar-i tanü ashi.
“Onoki election nung kija dang toktepnüa liasü aser BJP den tesentaktepji magizük, saka tanishirtemi onok ali nung inyakertemi ashiba mangai tesentaktep yanglu” ta Rajkonwar-isa ashi.
All Assam Students Union-i bendangertem anema mapa inyakba sentong tenzüker küm 6 lir külen 1985 küm AGP tentet aser anaben tashi – 1985 nungi 1990 aser 1996 nungi 2001 Assam nung parnoki sorkar ketdangsüogo.
1991 küm AGP mezüng lemsa aser iba sülen 2000 nung tanaben lemdang. Ano, 2005 küm taoba tir aser taoba chief minister Prafulla Kumar Mahanta-i telok balaka razüka orr Asom Gana Parishad (Progressive) tentet. Ajisüaka, 2008 küm pa tanaben AGP nung aden.