BJP general secretary Ram Madhav-i Tripura semdang

Agartala, July 11 (Agencies): Hokolbarnü BJP general secretary Ram Madhav-i anogo ananü Tripura semdangtsü atema Agartala tonga aru.
Tripura Tribal Areas Autonomous District Council (TTAADC) election agitsü lia Ram Madhav-i Agartala semdang ta BJP osang ka ajanga ashi.
Tayimtsü anendak State BJP President, Manik Saha, Agriculture & Family Welfare Minister, Pranajit Singha Roy, BJP State General Secretary tem Tinku Roy o Papia Datta nungertemi Ram Madhav pelaa agizük.
Agartala atongba sülen pai Udaipur nung Mata Tripureswari külem aser nikongtsütsü BJP headquarters nung senden ka amen.
Iba senden nung Tripura BJP president Dr Manik Saha aser tanga lennirtem aden.
Lockdown tembangogo aser iba jagi BJP-i unlock mapang mapa tenzüker, ta Ram Madhav-i osangbener dang ashi.
Tripura nung IPFT-i BJP den yariteper aser iba teloktep nung mangatettep kecha mali, ta paisa shisem.
Tawa tu Tripura nung BJP aser IPFT tsüngda metepmesü aiben adoka lir ajisüaka Ram Madhav-ibo mangatettep kecha mali ta shiogo.
“BJP lennirtem den ADC election dak sendakba onüktem benoka lemsatepogo. COVID-19 tebilemtsü ya süitemba sülen Cabinet nung temelenshi kar alitsü aser ibaji chief minister Biplab Deb-i sangoktsütsü” ta paisa metetdaktsü.
Honibarnü Ram Madhav-i IPFT lennirtem den ajurutepa senden ka amen. Iba senden nung IPFT tanishisang NC Debbarma, IPFT general secretary Mevar Kumar Jamatia aser tanga tongti ennirtem aden.