BJP-i “Ajak den Külemi, Ajak atema Terenlok” tangatetba nung inyaker: Nirmala Sitharaman

Dimapur, Tsüklai 16 (TYO): Bharatiya Janata Party (BJP)-i teti kechisarena ajaklen terenlok atema inyaker aser ibaji “Sabh ka Saath, Sabh ka Vikas” (ajak den külemi, ajak atema terenlok) tangatetba nung lir, ta tanü Union minister of Defence, Nirmala Sitharaman-i ashi.
Nagaland nung BJP atema nüboyimtsütsü atema Rogonü Nirmal-i Minister of State (Home), Kiren Rijiju den külemi Nagaland-i aru.
BJP-i terenlok mapa tajungba nung inyaktsü aser alima den tsüngkang medema renlokdaktsütsü atema alizüng lir. Sorkar ketdangsübaren nung shitak meinyaktetertemi BJP dak tetsübutsü keta lir aser temulung malemtsüla ta osangtem prokshir, ta tanü Dimapur nung Union minister of Defence-i o jembidang ashi.
BJP-i tamangba yimsü ajak kasa akhümtsübua temeyoktep aliba linük ka ta asüba tangatetba nung inyaksangshir. Onoki lokti longjemdaktsütsü aser state tejakleni odaktsütsü atema temulung agütsür, ta laisa ashi.
Prime minister Narendra Modi lenisüba kübok BJP sorkari Nagaland adena India-Myanmar-Thailand Trans Highway yangluba nung kanga temulung agütsür. Iba lenmang ajanga Nagaland adena South East Asia den sendakteptsü. Linük nung transportation network tajungba kümdaktsütsü atema onoki mapa inyaker, ta Nirmala-isa shisem.
Iba sentong nung Defence minister Nirmala-isa BJP party election manifesto sayatsü.
Minister of State, Home, Kiren Rijiju-ia o jembidang, Centre nung BJP-i sorkar ketdangsüba shia Naga yimten tebilemtsü koktettsü atema akokba tashi inyaka arur, ta ashi.
Prime minister Narendra Modi-i aniba BJP sorkar aser Naga yimten lennirtem tsüngda Luroi 3, 2015 nü “Framework Agreement” agitep aser nisung ajaki iba nung telemtetba ka agitsü imla atar, ta Rijiju-isa metetdaktsü.
BJP-i tekaratiba nung Naga yimten latettsü tebilemba pusema nungiter aser Naga nungeri aginüba sorkar ka akümba sülen yimjung maparen tajungba nung inyaka aotsü, ta paisa shisem.
Nagaland nung assembly election ya BJP-i kanga süoki ia agir aser taruba sorkar kümteta Naga nunger tarutsü yanglutsü atema bilemer, ta Rijiju-isa ashi.
Prime Minister Narendra Modi-i Tsüklai 22 nü Tuensang district semdanga BJP atema nübo yimtsütsü ta paisa metetdaktsü.
Iba sentong nung BJP candidate tem- H. Tovihoto Ayemi, Jacob Zhimomi, Yanthungo Patton aser BJP state president Visasolie Lhoungu-i anir ketdangsertem aden.