BJP-i aniba NDA sorkar tanaben arutsü: Rio

Dimapur, March 30 (TYO): Prime Minister Narendra Modi lenisüba kübok BJP-i aniba NDA sorkar tanaben arutsü anungji nübortemi PDA consensus candidate aser tang teinyakdak Lok Sabha MP Tokheho Yepthomi nem vote agüjang ta Chief Minister Neiphiu Rio-i tanü metetdaktsü.
Noklak aser Thonoknyu nung public sentongtem nung jembidang Rio-i “Nagaland nungi Lok Sabha menden ka dang lir aser iba MP jagi Nagaland nung alir ajak atema Parliament nung noktaker. Anungji state sorkar den amalitepa aser Centre den putepa inyakba MP ka nüngdaker” ta ashi.
“Opposition nungi MP kaji Parliament nung opposition bench nung ang amentsü. Anungji nübortemi shisa kaa tajungba nem vote agütsüdaktsünür” ta paisa shisem.
Nagaland ya state tila ka dang aser Centre dak nungi ang teyari imlar. Anungji state aser centre sorkar külemi yaritepba ajanga dang ajungtsü. PDA candidate ka shimba ajanga Delhi nung NDA den adentsü. Iba jagi 2003 nungi tenzüker tanü tashi BJP den tesentaktep ayur, ta Chief Minister-isa ashi.
Tanü Deputy Chief Minister Y. Patton, MP (LS) aser PDA candidate Tokheho Yepthomi aser Advisor Haying, Advisor L. Khumo aser party lennirtemi Chief Minister meina aru.