BJP-i aniba NDA sorkarji mapa inyakba sorkar

June 2, 2016 nü Kohima nung Union Minister, D V Sadananda Gowda, MoS Nihalchand Meghwal, CM  T.R.Zeliang, BJP lenirtem, Minister tem aser tongtibang nisungtem külemi tangokba noksa angur.  

Kohima, June 02 (TYO): Tanü IG Stadium, Kohima nung Law & Justice Union Minister, D V Sadananda Gowda-i, Ato kilonser Narendra Modi kübok Centre nung BJP-i aniba NDA sorkari linük GDP rate shilem 7.5 indaktsüba ajanga India ya alima nung rongsenkettsüng tekaratiba ainba linük ka kümdaktsüogo, ta metetdaktsü.
NDA sorkar küm ana ajungba den sentaktepa NPF adenba DAN aser State BJP Unit-i ayongzükba sentong nung jembidang Union Minister-i, “UPA sorkar ama masü saka NDA sorkari küm ana yimsüsüba mapang ochimashi ken o nung minister ka nem danga tai tonglokja mali,” ta ashi.
Narendra Modi ya mapa inyakba Ato Kilonser ka lir, ibayongji lanurtem atema mapa tasen adokdaktsütsü, aluyimertem jenjang ajungtsü, sensakertem aser jalatem densema tetsürtem jenjang ajungkettsütsü atema pai kanga meranga inyaker, ta shia minister-i state BJP aser NPF teloktep party tem dang BJP-i aniba NDA sorkari inyakbaji tesem ajaklen sangdongba den külemi Centre sorkari tajungtiba nung inyaktettsü atema nüburtem tangatetba metetdaktsüner, ta ashi.
Union Minister of State for Panchayati Raj, Nihalchand Meghwal-ia Ato kilonseri sangdongba scheme balala nungi state-i tajangzüktem agitsüla ta ashiba den külemi state sorkar dang, Centre nungi indangindanga tajangzük angutsü aser yimtsüng nung aliba nüburtem taküm jenjang ajungkettsü atema gram Panchayat ana mesüra asem tentettsüla, ta metetdaktsü.
State sorkari MGNREGA scheme junga inyakba atema tenüngsang agüja pai, Nagaland nung MGNREGA atema Centre-i sen crore 100 lemzüktsüogo, ta metetdaktsü.
NDA sorkar küm ana ajungba atema Ato kilonser aser par ministertem nem tenüngsang agüja Chief Minister, T R Zeliang-i, “Rongsenkettsüng jenjang aintsü atema tesüiba küm ana nung NDA sorkari mera tajung aika agiogo aser terenlok mapa kara inyaktsü atema Make in India, Skill India, Stand up India aser Jan Dhan Yojana ama scheme aika benokogo,” ta ashi.
Zeliang-isa, yimjung lenmang ajanga Naga yimtenren ken o latettsü atema Modi-i tasütait mera agia yaküm August 3 nü NSCN (IM) den tezüngzüktep agiba atema pa nem tenüngsang agütsü.
Tanü iba sentong ya Nagaland BJP Tir, Visasolie Lhoungu leniba nung agi, State Chaplain, Rev. Kuzierang Thou-i sarasadem, Rajya Sabha MP, K G Kenye-i lokti pelaa agizük aser Minister for Transport & Civil Aviation & IT, P. Paiwang Konyak-i tepela anküp o jembia liasü.