BJP-i aniba teloktepi state sorkar akümtsü: Oram

Dibrugarh, April 02 (Agencies) : Union minister for tribal affairs Jual Oram-i, BJP aser parnok den loktepba telokji taruba Assam state sorkar akümtsü, ta Hokolbarnü ashi.
Hokalbarnü Jonai, Dhemaji district nung election nübuyim sentong ka akadang o jembiba mapang Oram-i, BJP aser parnok den lokteper aliba telok yagi state nung nübur aika atsüa aruogo, ta ashi.
Congress-i küm 15 yimsüsüba mapang teraksa jenti adokdaktsüba den yimsü junga mesütet ta ashidang pai, State nungi Tarun Gogoi-i aniba sorkar atsütoktsüla, ta shisem.
“BJP-AGP-BPF teloktem lungjemer Sarbananda Sonowal lenisüba kübok kecha agia manokshitetba sorkar ka kümtettsü. Nüburtemi congress nem mapa peria agütsüogo, ajisüaka parnoki tajung kecha meinyaktet. Khen mapang ka nung Assam ya yimji yimjung state ka ta züngshia liasü saka tangbo teküpokba jenjang ka nung lir. BJP nem moangka khen agütsüdangang. Onoki state nung terenlok kara kara bentsür arutsü aser linük nung temaba state rongnung züngshidaktsütsü, ta Oram-i ashi.
Pa o jembidang state lisopur, kin trok atema ST jenjang atemabo kecha mesüok.
Jonai ya ST assembly constituency rongnung ka lir. Iba constituency nung Mising kin noklang nung shilem 95 lir.
Centre-i state nung aliba nüburtem temeten kümzüka ayutsü asoshi bendanga agüja inyaker aser Assam nung tribal tem terenlok asoshi teyari balaka, sen crore 539.79 agütsütsü lemtetogo, ta Oram-isa ashi.