BJP-i ano Tir candidate meshim: Amit Shah

Raipur, June 10 (Agencies): Honibarnü Bharatiya Janata Party (BJP) Tir, Amit Shah-i, party-i tang tashi Tir candidate meshim, ta metetdaktsü.
Tir election July 17, 2017 nü agitsü aser July 20 nü vote azüngtsü, ta Bodhbarnü Election Commission-i sangdonga liasü.
Opposition-i NDA nung madenba party ajak longjemer Tir candidate ka shimtsü atema inyakdar.
Ato kilonser, Narendra Modi-i Tir candidate atema BJP lenir tain, LK Advani shimtsü atema bilemdar, ta tamalen osang ka proka liasü.
Iba election nung voter ajak agi 4,896 (MLA 4,120 aser MP 776)-i vote agütsütsü temsüa lir.
Lok Sabha Speaker-i vote agütsütsü akok, ajisüaka Lok Sabha nung shimba Anglo-India nunger anatibo vote agütsütsü makok. Ano Rajya Sabha nunga shima aliba züngsem 12-i vote agütsütsü makok.
Tang teinyakdak Tir, Pranab Mukherjee kümsük July 24 nü tembangtsü. Tang tashi nung Pranab densema nisung 13-i Tir inyakogo, aser iba nungji VV Giri-i Tir anaben tashi inyakba densema lir.