BJP-i Assam Accord agientsü meranger: AGP

Guwahati, February 5 (Agencies): Assam nung BJP sorkar den taoba mapang yariteper AGP-i Mongulbarnü state sorkar aitsü.
Assam sorkari 1985 Assam Accord agientsü atema mapa inyaker ta AGP-i tai tongloktsü aser tanü state assembly senden nung medeni kimai alu.
Ajisüaka, Chief Minister Sarbananda Sonowal-i ashiba agi parnoki accord mapa küma inyaktsü atema mapa inyaker aser iba onük atema Centre den mapang shia oisanbg agitepdar.
Question Hour mapang AGP MLA Ramendra Narayan Kalita-i “Centre-i ashishitep aketba Citizenship (Amendment) Bill ajanga Assam Accord agientsü meranger” ta aitsü.
Idangji Parliamentary Affairs Minister Chandra Mohan Patowary-i Kalita dang langzüa “Centre-i accord agientsü ta jembitsü kecha temeten mali kechiyong iba accord nung clause 6 mapa küma inyaktsü atema high-powered committee ka tentetogo” ta ashi.
Taoba Congress sorkartemi lisopurtem ta ajatsüpurtem bushitsü merang saka telok ajaki mulunga magizükba ajanga iba mapa tembanga meinyaktsü. Ajisüaka, tang sorkari iba atema telemtetba ka agitsü, ta Patowary-isa ashi.
“Nai lisopurtem kümzüka ayutsü indang jembir. Assam sorkari lisopur ta ajatsüpurtem lateta lir asü? Mali süra, kodaser nenoki kümzüka yutettsü?” ta Kalita-i meyiper asüngdang.
“Ita ana lir Lok Sabha election agitsü lir. Kechiba committee ji küm ana tejakdang masü saka tang tentet? Taoba mapang tentet asübo onoki Centre-i inyakba mapa agizükla” ta paisa shisem.
Assam Accord nung Assamese nunger indang shia lir saka tang sorkari lisopurtem indang jembir, ta AIUDF züngsem Mamun Imdadul Haque Chawdhury-ia iba o atsütepa mapang olen ka ashi.
“Ya kong nungi aru? Governor indang onük nunga lisopurtem indang jembi. Kodaser iba ya atalok? Iba nungi tebilemba tai ka madokdaktsütsüla” ta paisa ashi.
Taoba mapang bendanger apurtem Indo-Bangladesh arrtsü tashi meindok saka tangbo formal repatriation pact meliaka Border Guards Bangladesh ket nung agütsür, ta Patowary-i ashi.
Idangji Kalita-i kodang BGB den mapa inyaktsü tenzük ta asüngdang saka Speaker Hitendra Nath Goswami-i supplementary question ka dang asüngdangtsü melar ta shia iba tasüngdangbaji magizük.
Iba ajanga AGP züngsemtem jashidaktsü aser parnoki ola adoka lungkak ait.