BJP-i Bihar election atema ‘vision document’ sayaogo

Patna, October 01 (Agencies):Brihostibar nü Union Finance Minister Arun Jaitley-i Bihar assembly election atema BJP indang ‘vision document’ sayaogo.

Tanü Bihar yimtiba, Patna nung agiba sentong nung Union minister ana aser senior party lenirtem densema liasü.

Tanü sayaba BJP vision document nung party-i school nung mark junga angur kaketshir tetsürtem nem scooty agütsütsü, dalits aser mahadalits nem coluor Tv agütsütsü aser shisaliok atema loan agütsütsü ta nangzüka lir.

BJP vision document nungsa party-i Atal Medicine Centre aika lapoktsütsü nangzükogo, kong mozü sen tajemtiba nung agütsütsü.

Tanü iba sentong nung jembidang Jaitley-i, “Onoki Bihar ya atsüngzüka aliba nungi kümzüktsü nüngdak. Congress, Janata Dal (United) aser RJD-i küm 68 tashi Bihar yimsü süogo saka kecha balaka meinyaktet. Onok indang vision document ya terenlok atema kulikaket ka lir,” ta ashi.

“Banka nung Ato kilonser Narendra Modi-i nüboyim sentong nung jembitsü anogo ka jakdang Jaitley-i vision document sayaogo,” ta BJP lenir aser Bihar nung party affairs incharge, Bhupender Yadav-i ashi.

Yadav-i ashiba agi, iba vision document nung tongtibang onüktemji- tetsürtem tashi, shisaliok, lanurtem atema mapa aser terenlok lir.

“Iba vision document nung, BJP-i aniba National Democratic Alliance-i election nung takok ngua taruba sorkar kümra, taruba küm pongu tsüngda Bihar state renloktsütsü indang sentong abensa shia lir,” ta paisa ashi.

Party atema tongtibangtiba onükji, Bihar nung terenlok, ta pai ashi.

Ano külen Chief Minister Nitish Kumar-i pa indang vision document nung taruba küm pongu tsüngda onük tenet nung ajemdaker Bihar nung terenlok agütsütsü ta shiogo. Item rongnung college aser University campus ajak nung Wi-Fi angati, kaketshirtem temaba züngyonga atutsü atema loan asoshi credit card scheme aser mapa mangurtem nem senotsü teyari agütsütsü densema lir.

Nitish Kumar’er vision document nungsa ki shia light aser metsümeshitak, aser kibong lakh 16 nung tzü mesüoktsütsü nangzüka lir.