BJP-i Bihar election nung tamakok anguba ya osang tajung ka: Pak

New Delhi/Islamabad, Nov. 9 (Agencies): Bihar assembly election nung Narendra Modi-i aniba BJP-i tamakok anguba sülen Pakistan nunger osangkaket ka ajanga, “Bihar nung BJP-i aniba teloktepi tamakok angubaji tesüiba ita ishika tsüngda India nungi anguba osang tajung mezüngbuba lir,” ta ashi.

Hombar nü News International-i parnok yimobilem tapak nung, “Iba election osang ya ajanga mapang tetemsü ka nung BJP dang, mapang ka nungbo tesempa politics jagi mapa meinyaktsü ta nenshia sayur lir,” ta ashi.

Kasa osangkaket ajanga, tawa Kashmir arrtsülen injang yoktepba, nashi shi dak sentakba aser Muslim onük den Pakistan nunger kentener anema inyakba onüktem ajanga India-Pak tesentaktep mejungi lir, ta ashi.

“Bihar nung vote agütsütepdang, kidanger linük Pakistan-a kanga jangraa liasü,” ta News International ajanga ashi.

BJP’er tamakok ajanga, rongsenkettsüng onük nung ajemdaker sorkar tashii aruyonga küm ka tsüngda BJP-i aniba sorkari linük indang tongtibang onüktem nungi pilaogo, ta sayur ta Pak osangkaket ajanga ashi.

“Bihar nung tamakok ajanga taruba küm pezü atema nüboyimtsü sabang amenokogo, BJP anema teloktep politics Bihar nung merangdangba ama, ibaji opposition party tem atema tongtibang asameyang ka akumtsüa akok. “Atangji, Bihar nung nüboyim sentongji Modi (Ato kilonser) leniba nung agi, iba tamakokji Ato kilonser kija tamakok ama züngshitsü,” ta parnokisa ashi.

Tan agiba Bihar state assembly election nung Janata Dal-United (JD-U), Rashtriya Janata Dal (RJD) aser Congress Party teloktep, Grand alliance-i BJP-i aniba party pezü teloktep MDA madak takok ngua liasü.