BJP-i CAB atema ‘Middle Ground’ ka bushir

New Delhi, January 31 (Agencies): Lok Sabha nung Citizenship Amendment Bill agizükba anema Northeast India nung nübortem lungkak aityonga aruba mapang ka BJP-i ‘Middle Ground’ ka bushitsü atema mapa inyaker ta osang angazüker.
Lok Sabha nung CAB agizükba anema Assam nung BJP den yaritepertem tesentaktep pilaogo aser Meghalaya o Tripura nunga BJP-i timtem ajurutsü ama tensa ka nung lir.
“Party tsütsü nungi onoki parnok ajak den jembidar, sorkar tsütsü nungia Home Minister-i North East sorkartem nung lennir tejentem den osang agitepdar. Ajaki mulungtsüsa onoki tiyongtsü nung angatetteptü atema lenmang bushidar” ta BJP general secretary Ram Madhav-i ashi.
Ajisüaka, Madhav-i ‘Middle Ground’ indang osang kecha mashi saka BJP-i reshikangshi tia ajururtem yaritsü ta nangzükba mamai, Northeast nung parnok den yaritepba teloktem aser nübortem taginübatem agizüktsü atema mapa inyakdar ta dang ashi.