BJP-i Delhi Municipal election nung takok angu

New Delhi, April 26 (Agencies): Bodhbarnü BJP-i Municipal Corporation of Delhi (MCD) election nung takok nguogo, parnoki MCD asem nung asemben tashi atonga takok angur.
Tamakok magizükteti AAP-i EVMs dak tai tongloktsüogo.
Küm ana tejaklen Delhi assembly election nung AAP-i assembly menden 70 nungi menden 67 tashi nung takok anguba sülen küm ana lir tang AAP-i Municipal election nung tamakok angur.
Tanü MCD election nung takok anguba atemaa BJP-i Ato kilonser, Narendra Modi ajanga lir ta tenüngsang agütsüogo.
Ano külen Congress-i tamakok anguba atema Delhi Congress tongti, Ajay Maken-i tenüng agiogo, aser pai pa menden nungi anentsü ta sangdongogo.
North Delhi Municipal Corporation (menden 103) South Delhi Municipal Corporation (menden 104) aser East Delhi Municipal Corporation ( menden 63) atema tokteper candidate ajak agi parnok 2,537 liasü.
Ano külen Aam Aadmi Party (AAP) MLA, Alka Lamba-ia AAP-i lar constituency kübok menden ajak nung party-i tamakok anguba atema lai tenüng agia party menden ajak nungi anentsü ta sangdong.
“Kü constituency kübok ward asemprong nung party-i tamakok anguba atema ni tenüng agir aser ni party menden ajak den MLA menden nungi anentsü,” ta ashi.
AAP lenir aser Delhi Deputy Chief Minister, Manish Sisodia-i, Delhi nüburtemi BJP nem vote sashia inoktsütsüsa kuli mali. BJP-i vote ishika tetsüngda agi akok nungbo ibajibo tagizüktettsü, saka vote tetsüngda aika aliba ya mamangteter, ta ashi.
Lokti lenir, Anna Hazare-ia taoba mapang pa den külemi atongsema inyaker, Delhi Chief Minister Arvind Kejriwal aija, “Nüburtemi pa nem tashi agütsü aser linük tesem ajungai tatishitsü agitsüsa Delhi yangertsü asoshi pai maongka angu. Saka tashi anguba ya majung. Na kodang yimsüsüba menden nung mendir, nü dak teshisadangba tashi samar,” ta ashi.
MCD elections nung takok anguba dak sentakba nung tanü Ato kilonser, Modi-ia, Delhi nüburtemi party dak tamang katetba atema pelar, ta metetdaktsü.