BJP-i Election nung tokteptsü telemtetba agiogo; Tsüklai 3 nü tribal hohos aser lokti tentettem senden amentsü

Kohima, Tsüklai (February) 01 (TYO): Naga nunger tribal tentettem aser lokti tentettemi ‘Election masü solution’ atema mepishiba magizüki tanü Bharatiya Janata Party (BJP)-i, Tsüklai (February) 27 nü Nagaland Assembly elections nung parnoki tokteptsü, ta sangdongogo.
Tanü nikongdang Delhi nungi BJP Nagaland Media Cell Convenor, K.James Vizo-i sangdong ka ajanga iba osangji metetdaktsü.
Naga nunger tribal tentet aser lokti tentettemi state nung election masü saka yimtenren latettsü atema mepishiba angaa Aenjeti 29, 2018 nü state nung National aser Regional yimtenren party balalai Joint Declaration ka ajanga election nung metokteptsü sangdongba sülen anogo asem lir tanü BJP-i Joint declaration nungi atsünger.
Core Committee of Nagaland Tribal Hohos and Civil Organisations (CCNTHCO) -i ayongba senden nung Joint declaration nungji BJP State Executive Council member, Kheto Sema-i sign süa liasü, saka anogo ka lir parnoki, election onük nung tatembangbuba telemtetbajibo BJP Central lenirtemi agitsü, ta metetdaktsü.
Tanü sangdong ka ajanga Vizo-i, “Tanü New Delhi nung State Tir, Visasolie Lhonugu leniba nungi BJP Nagaland State Unit nungi teshimtet telok ka- taoba State Tir, Dr M. Chuba Ao aser taoba Home Minister, Y. Patton nungeri National BJP General Secretary aser North East BJP election affairs in-charge, Ram Madhav ajuru,” ta metetdaktsü.
“Nagaland State BJP Election affairs dak sendakba nung o lemteptsü aser telemtetba agitsü atema BJP bangdak lenirtemi General Secy. (Madhav) nem tashi agüa lir,” ta pai metetdaktsü.
“State team-i Central lenirtem dang tang Nagaland nung yimtenren tensa indang metetdaktsü, aser o tatsü-talang ajak lemtepba sülen, state nung solution atema election agitsü sangdonga aliba ama BJP-i election nung tokteptsü lemtet,” ta Vizo-i metetdaktsü.
“Tang Naga yimtenren onük tekaraba nung latettsü atema BJP-i inyaker, aser India sorkar o ken o jembiba nung shilem agir teloktem tsüngda tezüngzüktep agiba ajak mapa küma inyakba nung BJP-i shilem agitsü,” ta paisa shisem.
BJP-i election nung tokteptsü atema telemtetba agiba osang dak sendakba nung CCNTHCO Co-convener aser Naga Hoho tatong Tir, H K Zhimomi dang asüngdangba ka langzüdang pai, Naga tribal tentettemi yimtenren party tem dang, yimtenren onük latettsü onükji Naga nunger ajaki süoki ia agir, ta sayutsü atema election nung shilem magitsü mepishi, ta metetdaktsü.
Zhimomi-isa, “Core Committee ka ama Naga tribal tentettem aser yimtenren party tem ajak longjemer ‘election magidang solution’ atema onok nem tashi agutsü, aser onokibo onok shilem inyakogo,” ta metetdaktsü.
Zhimomi-isa, ajisüaka item ajak atemaji tribal tentettemi telemtetba agitsü, aser iba atemaji Core Committee-i Tsüklai (February) 3 nü senden ka ayongzüka lir; iba senden nungji o tatsü-talang ajak lemteter tatembangbuba telemtetba ka agitsü, ta metetdaktsü.
Aenjeti 29, 2018 nü Joint Declaration nung sign süaka Naga People’s Front aser Congress nati, BJP-i election nung tokteptsü atema telemtetba agira parnokia shilem agitsü, ta metetdakja liasü.