BJP-i Goa nung MLA tem SUVs agi mesüzüker: Digvijay Singh

Panaji, March 10 (Agencies): Deobarnü Congress Party-i, Goa nung sorkar akumtsüsa parnok züngsem peria lir, ajisüaka BJP-i parnok nübo timba asutsü atema BJP nung madenba tanga party tem nungi MLA tem mesüzüktsü meranger, ta aitsü.
“BJP-i parnok pusemtsü atema party nung madenba MLA tem sen, minister menden, corporations aser SUVs agi mesüzüktsü meranger,” ta tanü Congress General Secretary, Digvijaya Singh-i aitsü.
Goa yimtiba, Panaji nung osangbenertem den jembidang Singh-i, “Yimtenren party kati tamakok nguaka, Chief Minister-i tamakok nguaka aser minister troki tamakok nguaka sorkar akumtsü merangba ni kecha state nunga mengudang,” ta ashi.
“BJP-i tamakok angubaji agizüktettsüla. Goa nüburtemi BJP tamakok ngudaktsü,” ta Congress lenir, Singh-i ashi.
Goa nung BJP lenir aser Chief Minister Laxmikant Parsekar-i Mandrem menden nung tamakok angu aser par party-i tamakok anguba sülen pai state Angh, Mridula Sinha nem CM menden nungi anenba shidi agutsü.
Ibaji dang masü saka Parsekar-i vote tali 7,000 dak temai tamakok angu, ano BJP cabinet minister trokia tamakok ngua liasü.
Singh-i, “Onoki (Congress) sorkar akumtsü atema BJP nung madenba MLA tem den tongtepa jembidar,” ta metetdaktsü.
Ajisüaka BJP-i party tilatem den loktepba ajanga parnoki sorkar akumtsü meranger, ta paisa ashi.
Tan agiba Goa assembly election nung Congress-i menden 17 nung takok ngua single largest party liasü, aser BJP-i menden 13 angu. Iba sülen sorkar akumtsü atema Congress aser BJP napronglai party tilatem mesüzüktsü meranger.
Goa assembly nung menden 40 lir, aser sorkar akumtsü atema majority mark ji 21 lir.
State nung tanga party tem rongnung MGP, Goa Forward Party aser independent shiai menden asemsem angu aser NCP-i menden ka angu.