BJP-i Gujarat aser Himachal Pradesh nung sorkar akümtsü

New Delhi, December 18 (Agencies): Hombarnü BJP-i Himachal Pradesh nung Congress madak takok angu aser Gujurat nung maneni tashi nguogo.
BJP-i state ana nung takok anguba ajanga tang India linük kübok state 19 nung BJP aser parnok den yaritepba teloktemi sorkartem kümteta lir aser tanüngba pungu nung Congress lir.
BJP-i Gujurat nung menden 99 takok angu aser ibaji züngsem 182 agi akümba assembly nungi sorkar akümtsü nüngdakba menden 92 nungi tenet agi teimba lir. Himachal Pradesh nungbo BJP-i menden 68 nungi 44 nung takok angu.
Tir tasen Rahul Gandhi-i anir Congress-i exit polls aser tanga asadangtetbatem ajak tiyazü kümja Gujurat nung menden 80 takok angu. Himachal Pradesh nungbo parnoki tamakok tulu angu aser ibaji assembly menden 68 nungi 21 nungdang takok anguba lir.
Iba ajanga Lok Sabha züngsem 10 mesüra tema shimba state state 18 nungi Congress-i Punjab aser Karnataka nung dang sorkar küma lir. Iba sülen Meghalaya, Mizoram aser Puducherry nung dang Congress sorkartem lir.
Narendra Modi-i Prime Minister aser Amit Shah-i BJP president akümba sülen state aika nung Congress sorkartem tamakok ngudakja arur.
Modi aser Shah lenisüba kübok BJP-i Maharashtra, Haryana, Jharkhand, Assam, Uttarakhand, Goa, Arunachal Pradesh aser Manipur nungi Congress sorkartem atsüngdokogo aser tang tesüsa parnoki Himachal Pradesh nunga atsüngdokogo.
Goa aser Manipur nung party kati danga sorkar akümtsüsa menden peria mengutet aser BJP-i Congress dang nung menden tajemba angu saka parnoki tanga party aser independent tem den lokteper sorkar aküm.
Iba mapang Congress-i takok anguba state ji Punjab dang lir.
BJP-i tamakok anguba state temji West Bengal, Kerala aser Tamil Nadu nungdang lir saka item state nung parnoki sorkar akümtsü tebilemba mali.
Himachal Pradesh-i tesüiba mapang benshia aruba ama opposition nem vote agütsü aser ibaji ajanga parnoki BJP nem sorkar akümtsü tashi agütsü.
“Congress-i Himachal Pradesh nung tamakok angutsü ta asübaji bilemba ama dang atalokogo. Iba state nung sorkar melentepa kümdaktsüba sobaliba lir, parnoki election sülen election nung sorkar melentepa kümdaktsür, saka takoksaji takoksasa lir” ta Centre for the Study of Developing Societies (CSDS) nungi Sanjay Kumar-i osangbener dang ashi.
Gujarat elections indang jembidang CSDS nungisa Mahasweta Jani-i ashiba agi, Gujurat nung tangar memenepba nisung ajaki Congress nem vote agütsü aser parnokji aluyimertem, Scheduled Castes aser lisopurtem lir, saka jila nung alirtemi BJP nung masetshii nokdaka lir.
“Jilatem nung aliba Patidar nungertemia BJP nem vote agütsü” ta Jani-isa shisem.
BJP-i takok angubaji mapa tajung inyakba aser terenlok ajanga lir, ta BJP president Amit Shah-i osangbener senden ka nung ashi.
Gujarat nung Congress madak tera agi dang takok angu asü ta asüngdangdang, shilem 8 agi teimba ser takok angubaji tera agi dang takok anguba masü, ta Amit Shah-i langzü.
“BJP-i Congress dang nungi state ka nungi ka nguyonga arur. Congress-i national party ta ajaba tenüng samaogo aser tang linük nung national party ta ajatsübaji BJP dang lir” ta BJP otongdar GVL Narasimha Rao-i ashi.
Ajisüaka, Congress-i ashiba agi, Gujurat nung Rahul Gandhi lenisüba kübok menden aika angubaji “moral victory” ka lir.
“Congress’ President Rahul Gandhi lenisüba kübok Congress-i nüboyimba nung moral victory nguogo” ta Gujarat atema AICC general secretary in- charge, Ashok Gehlot-i ashi.