BJP-i Gujarat assembly election atema party manifesto saya

Ahmedabad, December 08 (Agencies): Hokolbarnü Bharatiya Janata Party (BJP)-i Gujarat assembly election atema party manifesto sayaogo.
‘Sankalp Patra 2017’ ta ajaba party manifesto ji Ahmedabad yimti nung Union Finance Minister aser BJP lenir tain, Arun Jaitley-i sayatsü.
Manifesto sayaba sülen Jaitley-i mapang tatsüka osangbenertem den jembidang pai, Patidar nunger reservation onük nung Congress-i yazü aika nangzüker, ta aitsü.
December 9, 2017 nü state election mezüngbuba shilem agitsü lia tanü BJP indang manifesto sayaogo, aser iba mapang nung Jaitley-i, “Gujarat nung telemsa adokdaktsüba ajanga state yimtenren raksatsütsü, aser Congress-i yamaji inyakra ibaji ajanga state raksatsütsü,” ta ashi.
State nung Congress-i BJP yimsüsüba aitsüba dak sendakba nung Jaitley-i, “India nunger rongsenkettsüng timtiba ainbaji Gujarat lir. Tesüiba küm pongu nung state indang average rate ji state tulutem indang shilem 10 liasü,” ta ashi.
“Gujarat atema Congress nükjidongji tamakoktsü aser senotsü tsütsülena tamakoktsü,” ta BJP lenirisa ashi.
December 4 nü Congress-ia Gujarat election atema party manifesto sayaa liasü, aser parnoki state nung aluyimertem atema tongtibangsüa inyaktsü ta nangzüka lir.
Manifesto nungsa Congress-i, party-i takok ngura state nung scheduled castes aser tribes den Other backward classes atema reservation shilem 49 dak alia party sorkari linük temzüng Arrla 46 kübok tekaraba nung assembly nung bill ka benoktsü, ta nangzüka lir.
Gujarat nung assembly menden 182 lir, aser shilem ana lemsar election agitsü.
Saurashtra aser South Gujarat region kübok constituency 89 atema December 9 nü election agitsü aser tanüngba menden 93 atema December 14 nü election agitsü aser December 18 nü vote zünga election osang sangdongtsü.